EHUko Gobernu Kontseiluak errektorea aukeratzeko hauteskundeen egutegia onartu du gaur. Lehen bozketa abenduaren 4an izango da. Hala ere, Juan Ignacio Perez Iglesias ez da berriro aurkeztuko, egun jarduneko errektorea denak batzarraren ostean emandako prentsaurrekoan jakinarazi duenez. Maiatzaren 22an egindako hauteskundeetan, hautagai bakarra izanda ere, Perez Iglesiasek ez zuen bere kudeaketaren azterketa gainditu, boto eman zutenen artean, eta botoa estamentuen arabera moldatu ostean, %54,6k ezetza eman zion. Hala ere, agudo zabaldu ziren berriro aurkeztuko zela zioten zurrumurruek, berak galduz gero berriro aurkeztuko ez zela adierazi arren.
Hauteskunde-prozesuko beste data garrantzitsu batzuk hauek dira: azaroaren 10ean hautagaien behin-behineko aldarrikapena egingo da; azaroaren 14an hautagaien behin betiko aldarrikapena egin eta hasiera emango zaio kanpainari; abenduaren 2an hautagaiek euren programa defendatuko dute Klaustroan eta horrekin amaiera emango zaio kanpainari. Inongo hautagaik lortzen ez badu boto baliodunen gehiengoa lehen bozketan haztapena egin ondoren, abenduaren 12an bigarren bozketa egingo da. Aukeratutako hautagaiaren behin betiko aldarrikapena abenduaren 15ean izango da bozketa bakarra egiten bada, eta abenduaren 22an, berriz, bi bozketa eginez gero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun