Gobela ibaia bideratzeko proiektua prestatzen dabiltza Getxoko Udala eta Jaurlaritza
Getxoko Udalak eta Eusko Jaurlaritzaren Ingurumen Sailaren menpe dagoen Uraren Euskal Agentziak (URA) oinarrizko hitzarmena adostu zuten atzo Gobela erreka eta bere bazterrak bideratzeko proiektua egiteko, uholdeak ekidin aldera. URAk egindako proiektua Esther Larrañaga Ingurumen sailburua Imanol Landa alkatea buru zituen batzar batean aurkeztu zuten. Bi erakundeetako teknikariak ari dira berraztertzen egitasmoa, ondoren behin betiko onespena eman ahal izateko, tokiko iturriek adierazi dutenez. Udalbatzan onartu eta gero, Jaurlaritzarekin lankidetza hitzarmena sinatu beharko dute, azken horrek proiektua diruz lagundu ahal izateko. Argazkian, hainbat lagun Gobela errekari adi, joan den igandeko euriteen ondoren.
Bi erakundeek adostu zuten, halaber, proiektua jendaurrean ipintzea herritarrek ezagutu ahal izateko. Getxoko Gobernu Taldeak datozen egunetan bere garrantzia eta mamia azalduko die Udalbatza osatzen duten alderdiei. Ingurumen Sailburua eta Getxoko alkatea bat etorri dira adostutako hitzarmenak duen garrantzia nabarmentzerakoan, "inguruko bizilagunentzat oso garrantzitsua den proiektua gauzatzea ahalbidetuko duelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun