Zauritutako kurrilo galdu bat agertu zen atzo goizeko 8etan Leioako udaletxearen inguruetan, leioaztarren harridurarako. Zehatz mehatz hegaztiak eliza, udaletxea eta hilerriaren artean hartu zuen lurra, ezker hegoan zituen zauriengatik eta luma batzuen faltagatik hegaldia mantendu ezin zuela. Zoritxarrez, erortzean zuhaitz baten kontra talka egin zuen animaliak. Horra bertaratu ziren hainbat udal langile, animalia bizirik zegoela konprobatu eta udaltzainei Bizkaiko basa-animaliak babesteko Gorlizko foru zentrora deitzeko eskatu zietenak. Kurriloa migrazio epez kanpo zegoen eta anka batean eraztun gorri bat zeraman. Hortaz, litekeena da norbaitek abere exotiko gisa izatea eta hegaztiak ihes egin izana. Argazkiak: Iñaki Legarreta.
Hegoak zabalik 1,60 bat metro neurtzen duen animalia harrapatzeko agertu egin ziren udaltzainak, eskuetan folio kutxa bat zutela. Izan ere Udaltzaingoko arduradunak agenteei hegazti bat harrapatu behar zutela baino ez zien esan. Azkenean, eta hegaztiak ihes egiteko hainbat saiakera hutsal egin ostean,10:30ak aldera Bizkaiko basa-animaliak babesteko Gorlizko foru zentroko kideek eta udal langileek kurrilo kaiola batean sartu eta Gorlizko norabidean jarri zuten, animalia sendatu eta berarekin zer egitea deliberatzeko. Mota horretako animaliaren bat agertu zen azken aldia 2006ko irailaren 8a izan zen, Areetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun