Gurasoek seme-alaba jaio berriekin euskaraz hitz egiten hasteko liburuxka banatuko du Leioako Udalak
"Ku-Ku!" (pdf) izenburuko liburuxka 2006, 2007 eta 2008an jaiotako leioaztar txikitxoen aita-amen etxeetan banatuko da laster. Ekimenak, euskaraz ondo moldatzen ez diren gurasoak euren seme-alaba txikiekin hizkuntza horretan jardun daitezen ahalbidetzea du helburu. "Bizitzaren lehen urteak oso garrantzitsuak dira hezkuntza eta hizkuntzaren aldetik, hau da, haurtzaroan hizkuntza jatorra erakusteak horren menderatzea ekarriko du heldutasunean, eta horrek on egingo dio pertsonari zein hizkuntzari", Leioako udal iturriek azaldu duetenez. Hori dela eta, euskara menderatu ez baina euren seme-alabak euskararekin lehen harremana haurtzaroan izatea nahi duten gurasoentzako liburuxka banatuko dute. Argazkian, umetxoa jolasean / Xurde.
Liburu horrek lau atal ditu eta haurtzaroan erabiltzen ditugun berbak eta esamolde ohikoenak biltzen ditu. Lehen atalean ("Haur hiztegi irekia") umeen hizkeraren oinarrizko hainbat hitz eta esamolde (kili-kolo, lolo, kika…) bildu dituzte, euskararen berezitasunekin, bederatzi ataletan sailkatuta. Bigarren atalak ("Horrela ez!") haur txikiekin euskaraz hitz egitean maiz egiten diren akatsak eta hauen zuzenketak jasotzen ditu. Hirugarren atalean, berriz, bost jolas kanta datoz. Eta laugarrenean, beste zazpi abesti. Bukatzeko, haurrentzako euskarazko kantak biltzen dituzten zenbait CD eta haurrentzako euskarazko liburu zerrenda interesgarria ere jasotzen da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun