Auzolan programan esku hartu duten Uribe Kostako Gizarte Zerbitzuetatik zetozen zortzi lagunek (zazpi emakume eta gizon bat) Barrikako hainbat berdegune berreskuratzeko eta zaintzeko lana egin dute. Zehazki, sei hilabetetan sastrakak garbitzea eta bideen txukuntzea egin dute, kimuei buruzko ikastaroa jasotzeaz gain. Ekintza horrek Eusko Jaurlaritzaren eta Emaus Fundazioaren laguntza izan du, eta helburu nagusia bazterkeria arriskuan dauden gizon emakumeei lan aukerak ematea da, programa amaitzean beren kabuz lana aurki dezaten. Aldez-aurreko hautaketa egin zuten Uribe Kostako Mankomunitateko Gizarte Zerbitzuek, eta Emaus Fundazioak aukeratu zuen lana burutuko zuen taldea. Argazkian, Barrikako larretako sastrakak garbitu eta bideak txukundu dituzte Auzolan programan esku hartu duten lagunek.
Auzolanen bitartez, hasierako heziketa jasotzen duten pertsonek informatika eta Interneten oinarrizko ikasbideak jasotzen dituzte, eta lan esparru zehatz batean espezializatzen dira gero. Gainera, jarduerak irauten duen hilabeteetan lan kontratua jasotzen dute, koordinadore baten laguntza eta babesa eta begirale batek banaka-banaka lana aztertzen die. Beharra amaitzean norabide profesionaleko laguntza ere eskaintzen zaie. Jardueratan esku hartzen duten guztiei agiria ematen die Jaurlaritzaren Enplegu, Justizia eta Gizarte Segurantzako Sailak. Auzolan programan esku hartzeko Oinarrizko Errentaren onuradun izan behar da, edo Gizarteratzeko Hitzarmen batean izena emanda egon behar da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun