Amnistiaren Aldeko Mugimenduaren (AAM) kontrako epaiketaren azken saioaren hasieran defentsako abokatuek beraien informea aurkeztu dute, bertan epaiketan eraman duen bideari kritika zorrotza egin zaiolarik eta "inolako frogarik aurkeztu ez den epaiketa politikoa" izan dela salatuz, Askatu.org webguneak zabaldu duenez. Ondoren, auziperatuek azpimarratu dute jokoan ez dagoela 27 lagun horien etorkizuna bakarrik, "Amnistiaren Aldeko Mugimendua baita finean zigortu nahi dutena". Hala ere, argi esan nahi izan dute "Amnistiaren Aldeko Mugimenduak lanean jarraituko duela herri honetara minimo demokratikoak ekarri arte". "Euskal Herriaren hitza eta erabakia lortu eta Amnistiaren bidean lanean" jarraituko duela alegia. Carlos Bautista fiskalak 33/01eko 24ren kontrako zigorrak eskatu ditu, tartean Jagoba Terrones berangoztarra dagoela. Mitxel Sarasketa getxoztarraren eta Maitane Mendez eta Jorge Arredondoren kontrako karguak, berriz, atzera bota ditu. Argazkian, auziaren aurka Leioa eta Erandioko campusean egindako elkarretaratzea.
Julen Larrinaga, Maite Diaz de Heredia, Sabin Juaristi eta Juan Antonio Madariaga 33/01eko auzipetuek hartu dute hitza eta lehen egunean esandakoak berretsi dituzte. Madariagak sufrimenduaren inguruan hitz egin du eta argi utzi nahi izan du "sufrimenduaren monopolioa" ez duela Espainiako Estatuak. Hemen gatazka bat dagoela adierazi du, eta "gatazka horretan dauden alde guztiek sufritzen dutela". Bere hitzetan, "kontua ez da gehiago nork sufritzen duen neurtzea, sufrimenduarekin amaitzeko borondatea nork duen baino".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun