Ikurrinari omenaldia egingo diote bihar Erandion
2008ko eka. 19a, 21:46
Erandioko Ikurrinaren Aldeko Ekimenak deituta, bihar, ostirala, Euskal Herriko banderari omenaldia egingo diote Erandioko udaletxe aurrean 19:30etik aurrera. Izan ere, Mikel Arieta-Araunabeña alkate jeltzaleari udaletxean "inposaketaren eta errepresioaren ikurra" den Espainiako bandera jar ez dezan eskatzeko sinadura bilketa abiatu zuten Erandioko auzokideek pasa den apirilaren 19an, eta ehunaka lagunen sostengua jaso ostean lehenengo mobilizazioari ekin diote, biharko omenaldiari hain zuzen ere. Hortaz, 19:30ean omenaldia izango da, ordu erdi beranduago herri kalejira eta horren ostean festa antolatuta dago Ibarra kalean, txorizada, trikitixa, bertsolariak, sokatira eta euskal dantzak izango direla bertan. Argazkian, Altzagan jarritako sinadura mahaia.Pasa den apirilean, Espainiako Gobernuaren Ordezkaritzak eraman zuen epaitegietara Erandioko Udala, orain arte bandera hori eta gorria uneoro ez jartzeagatik. Salaketa Bilboko Administrazio-Auzietarako Epaitegiak tramitera onartu eta ikerketa abiatu zuen, aurretik Bilbon Espainiako Auzitegi Gorenak agindu ostean Iñaki Azkuna bertako alkateak Espainiako bandera jarriz amaitu zuen prozesuaren antzera. Baina, Bilboko aurrekaria ikusita, Erandioko auzokideak kalera irten ziren epaileen erabakiaren zain gelditu gabe eta sinadurak biltzeari ekin zioten. Ekimenaren antolatzaileen arabera, Arieta-Araunabeñak dagoeneko jaso du "bandera jartzeko agindua" eta "betetzeko asmoa duela esan du alkateak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun