Nonahi aurkitzen ditugu zigarro‑mutxikinak botata, gure herriak, hondartzak, basoak… zabortegiak balira bezala. Baina ez da zikinkeria bakarrik. Ohitura horren ondorioak urrunago doaz. Txori gazteen, dortoken eta itsasoko zenbait animaliaren urdailetan aurkitu izan dira horrelakoak, Mankomunitateko arduradunek nabarmendu dutenez. Eta horrek liseriketa‑sistemaren blokeoa eragin diezaieke, baita heriotza bera ekarri ere. Umeek ere nahi gabe irentsi ahal dituzte, eta ondorioz, goragaleak, logurea edo konbultsioak sortu ahal zaizkie.
Ez dira biodegradagarriak
Zigarroen iragazkiak ez dira biodegradagarriak, hau da, degradatu baino lehenago, hamarka urtetan egoten dira gure ingurumenean. Mutxikinek milaka osagai dituzte, eta horien produktu kimiko pozoitsu disolbagarriek ingurumena kutsatzen dute. Zigarro mutxikinak zabor kausarik handiena dira munduan. Mutxikin bat lurrera botatzen denean, euriak ur‑iturriraino eramaten du. Heltzen diren milioika mutxikinek askatzen dituzten produktu kimikoek kalte egiten diote ekosistemari eta txartu egiten dute uraren kalitatea.
Hori guztiagatik hainbat gomendio eman dituzte Mankomunitateko iturriek. Batetik, inoiz ere zigarro‑mutxikinik komuneko zulora ez botatzeko eskatu dute. Baita zigarroa ondo itzali eta, gero, zaramara botatzea ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun