Erromeria eta sokatira Goiherriko jaietako protagonistak izango dira gaur eta bihar

Erandioko Goiherri auzoan San Kristobalen aitzakiapean atzo abiatutako jaiek aurrera darraite. Ohiko asto proben ostean gaur erromeriari egokituko zaio plaza betetzea. izan ere, gaueko 11:00ak aldera Trikizio taldeak izango du oholtzatik goiherritarrak eta bisitariak mugiarazteko ardura. Baina bihar izango da benetako arduren eguna, gutxienez auzoko Goiherri A sokatira taldeko zortzikotearentzat. Arratsaldeko 18:00etatik aurrera, eta auzokide guztien begibistan, goiherritarrek Lur Gaineko Euskadiko Sokatira Txapelketako 600 kiloko txapela jokatuko dute Laukizko Gaztedi taldekoen kontra. Bi taldeak berdinduta ailegatu dira azken tiraldira, sailkapen nagusian 9na puntuekin amaitu baitzuten eta berdinketa apurtzeko egindako bi saioetan tiraldi bana irabazi dutelako. Orain arte goiherritarrek 640 eta 680 kiloko txapelak eskuratu dituzte aurten. Auzo ohorea defendatu ostean, gaueko 11:00etan erromeria doinuak bueltatuko dira landetara, Sugan taldeari esker. Igandean, jaiak bukatzeko, puzgarriak eta asto probak izango dira goiz eta arratsaldez. Argazkian, Trikizio taldeko kide bat / Roser Ortiz.