Algortako elkarretaratzean atxilotutako gizona kaleratu dute
2008ko uzt. 23a, 19:23
Goikoetxea, Kotano, Gutierrez, Saratxo eta Guardia Zibilak egindako operazioan atxilotutako beste bost lagunen askatasuna aldarrikatzeko atzo bertan Algortan egindako elkarretaratzean Ertzaintzak atxilotutako gizona askatu egin dute gaur goizean. Etengabe Uribe Kostako Amnistiaren Aldeko Mugimenduaren bitakorak jakinarazi duenez, J.M. 42 urteko algortarra gaur eguerdian askatu dute, epaitegitik pasa ostean. Algortarrari aginteari eraso egin izana leporatu diote eta hilean behin sinatu beharko du epaitegian. AAMk salatu duenez, "gauean Gurutzetako ospitalera eraman behar izan dute atxilotu aurretik eman zizkioten kolpeaz artatzeko. Gaur goizean forentseak ere begiratu egin du".Errepresioaren aurkako mugimenduak Ertzaintzak jarritako akusazioa ere izan du hizpide: "esan behar da ertzainek harri bat bota zuela esan dutela, eta epaitegian 'froga' modura harri bi eraman dituzte". Akusatuak ordea hori guztia gezurra dela esan du. Azaldu duenez, espaloian zegoen ertzainak bultzaka hasi zirenean jendea alde egiteko eta jendea oldartzen hasi zirela. Berak buelta eman eta oinez hasi zen, beste batzuk lasterka zihoazenean. "Orduan atzetik ertzain batek esan zion 'tu, a la carrerilla' eta segituan kolpe bat eman zioten bizkarrean. Ondoren kolpeka lurrera bota eta lurrean kolpe gehiago eman zizkioten. Altxatu eta ertzain batek 'hau atxilotu' esan eta eraman zuten, besterik gabe", azaldu du "muntaia poliziala" AAMk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun