Askatasunaren oharra:
Pertsona bat atxilotu dute gaur goizean Algortan
Inge Urrutia da atxiloturiko pertsona. Asteartean atxiloturiko 9 herritarrak Madrilen aurkitzen dira inkomunikaturik. Askatasunak torturak izateko arriskuan jarraitzen dutela salatu du. Mobilizazioak deituak daude gaur ere.
Atxiloketa bat Algortan
Gaur goizeko 12:00etan Inge Urrutia atxilotu dute Algortan. Etxetik atera denean paisanoz zihoazen gizonezko batzuk atxilotu eta kotxe batean eraman dute. Ez dakigu zein gorputz polizialek burutu duen atxiloketa hau.
Asteartean atxilotutakoen informazioa
Asteartean Guardia Zibilak atxilotu zituen 9 euskal herritarrak inkomunikazioa egoeran jarraitzen dute. Baltasar Garzon epaileak inkomunikazioa 5 egunetara arte luzatzeko erabakia hartu du.
Momentu hauetan atxilotuak Madrilen aurkitzen dira. Konfiantzako medikuek ikusi ahal izan dituztela konfirmatu ahal izan dugu, hala ere ez dakigu zein egoeratan aurkitzen diren atxilotuak.
Mobilizazioak deituak dira gaurko ere:
- Algortan, 20:00etan Telletxen.
- Elorrion, 19:30etan plazan.
- Santutxun, 20:30 Karmelo plazan.
Askatasunaren Salaketa
Ohartarazi nahi dugu asteartean Guardia Zibilak atxilotu zituen 9 herritarrak torturak jasateko arrisku larrian jarraitzen dutela. Garzon epaileak tortura zaildu dezaketen neurri batzuk hartu baditu ere, neurri horiek ez dute tortura ezinezkoa egiten. Torturarik egon ez dadin inkomunikazioa egoera altxatzea beharrezkoa da.
Zoritxarrez torturak ekiditearen alde egin beharrean, Garzon epaileak inkomunikazio epea 5 egunetara arte luzatzeko erabakia hartu du. Horrela, tratu txarrak eta torturak ahalbidetzen dituen inpunitatea espazioen aldeko apustua egiten du. Milaka herritar basatiki torturatu dituen Guardia Zibilari horretan jarraitu dezan behar duen babesa emanez. Gogor salatu nahi dugu Garzonek harturiko erabakia.
Estrategia errepresiboaren aldeko apustua egiten dutenei exijitzen diegu, bide hori alde batera utzi eta herritarren oinarrizko eskubideak errespetatu ditzatela.
Herritarrei dei bat luzatzen diegu atxiloketa hauen, zein errepresio ororen aurrean antolatu eta mobilizatzen jarraitu daitezen. Norabide horretan, antolatu diren protesta mobilizazioetan parte hartzeko deia luzatu nahi dugu.
Errepresioa ez da bidea!
Atxilotuak askatu!
Aski da!
Askatasuna
Inge Urrutia 19 urteko gaztea atxilotu dute gaur goizeko 12etan Algortan kalez jantzita zihoazen hainbat gizonek, Askatasunak jakinarazi duenez. Atxiloketa neska etxetik atera denean izan da. Orduan gizonezkoek kotxe batera sartu eta eraman egin dute. Askatasunak ez du zehazterik izan poliziak zer gorputzekoak diren, baina albiste agentziek Guardia Zibilari egokitu diote atxiloketa berria, asteartean Bizkaia komandoaren aurka zabaldutako sarekadaren barruan hamargarrena jada. Dena den, agentziek filtratu dutenez Urrutia ez da Guardia Zibilak iragarri zuen ihes egindako mutil gaztea eta, beraz, oraindik izan daitezke atxiloketa gehiago, operazioa zabalik jarraitzen baitu. Bestalde, Saratxo, Gutierrez, Goikoetxea, Kotano eta aurretik atxilotutako beste bosti inkomunikazioa ahal duen guztia luzatu eta larunbatean eguerdian jarri die Auzitegi Nazionalean egoteko hitzordua Baltasar Garzon epaileak, ordu batzuk beranduago galdekatzeko, "behien atestatu polizialak aztertuta". Bitartean, Guardia Zibilaren eskuetan jarraituko dira, Madrilen, inkomunikatuta. Ez dago argi Urrutiak noiz deklaratu beharko duen. Askatasunak hamar atxilotuek torturatuak izateko arriskuan jarraitzen dutela salatu du eta inkomunikazio egoerarekin eguneko mobilizazioekin jarraituko du gaur eta hurrengo egunotan. Hitzordua Algortako Telletxe kalean jarri dute, 20:00etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun