Hedabideek hamaika eta bi atentatu plangintza leporatzen dizkiete atxilotuei
2008ko uzt. 25a, 13:48
Asteartean Garzon epaileak eta Guardia Zibilak Bizkaia komandoaren ustezko kide eta laguntzaileen aurkako sarekada abiatu zutenetik hedabideetan hainbat egitasmo leporatu dizkiete atxilotuei. Atxilotuak inkomunikazio egoeran eta guardia zibilen eskuetan eta sumarioa sekretupean egon arren, albiste agentziek ez dute oztoporik izan egunero egunero atxilotu bakoitzari buruz ustezko nondik norakoak zehazteko. "Ikerketa iturriak" behin eta berriro aipatuta, datorren ostegunean, hilak 31, Algortako patroia den San Inazio egunean, jaietan, Getxo udalerrian atentatu handia egingo zutela esan dute. Grande Marlaska Espainiako Auzitegi Nazionaleko epailea erail nahi zutela ere filtratu dute. Zinegotzi sozialista bat bahitu eta Miguel Angel Blanco bezala hiltzeko plana izatea ere leporatu diete, baita Barakaldoko Bilbao Exhibition Center izeneko erakustazoka desegiteko asmoa ere. Argazkian, "El Correo Español"ek argitaratutako erreportaje bat.Bitartean, balizko froga batzuk aurkeztu dituzte hedabideek, tartean atxilotuei egokitzen dieten Ezkaraiko zuloa eta 125 kilo lehergailu. Antzeko zer edo zer gertatu zen 2007ko urrian, Algorta, Getxo eta Berangoko hainbat gazte kale borrokarekin lotura zutelakoan atxilotu zituztenean. Orduan, hedabideek barra-barra zabaldu zuten batzoki bat zartatzeko edo zinegotzi popularren aurka jarduteko balizko plangintzak eta horretaz ezer ez zen agertu ondoren Garzonek eurak kartzelaratzeko emandako autoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun