Iturri beraren aburuz, Goikoetxeak ETAren Bizkaia komandoko kidea izatea eta Garikoitz Aspiazu "Txeroki" ETAren ustezko buruzagiaren aginduak jaso izana onartu ei zuen. Komandoaren ekintza edota asmoei buruzko galderei ez omen zien erantzun. Juan Manuel Piñuel guardia zibilaren hilketa leporatzen diote, besteak beste.
Delgado fiskalak hainbat delitu egotzi dizkio "Torrotxero"ri, tartean: Piñuelen heriotza, Benjamin Atutxa PSE-EEren zinegotzia bahitzen saiatzea, Fernando Grande-Marlaska epaile hiltzeko saiakera eta uda honetan Andaluzian hainbat atentatu prestatzea.
Inge Urrutia gazte algortarra eta Adur Aristegi eta Libe Agirre elorrioarrak aske utzi ditu Baltasar Garzon epaileak, Aristegiren kasuan, 12.000 euroko fidantza ordaintzeko baldintzapean. Bizkaia komandoko kide edo laguntzaile izatea leporatzen dieten beste zazpi atxilotuak, tartean Arkaitz Goikoetxea, Iñigo Gutierrez, Aitor Kotano eta Mikel Saratxo kartzelara bidali ditu Espainiako Auzitegi Nazionaleko Instrukziorako 5. Aretoko epaileak. Bestalde, Anabel Prietok tratu txar fisikoak eta psikologikoak salatu dituela jakinarazi du "Berria"k. Prieto konfiantzako abokatuarekin deklaratu zuen, asteartean eta ostegunean gatibu hartutako beste guztiak inkomunikazio egoeran egin zutela. Efe albiste-agentziaren arabera, Garzonek hartutako erabakiak bat datoz Dolores Delgado fiskalak egindako eskaerekin. Garzonen autoa osorik irakur daiteke hemen. Argazkian, egunotan hainbat mobilizazio izan dira atxilotuen alde. Atzo, "Torturatzaileak alde hemendik" lelopean 200 lagun batu ziren Algortan AAMk jakinarazitakoaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun