Aurten 80 ekoizle baino gehiago batuko ditu Algortan San Lorentzo azokak
2008ko abu. 7a, 12:38
Urtero bezala, San Lorentzo azoka ospatuko da Algortan abuztuaren 10ean, igandearekin. Gainera, Portu Zaharreko jaietan guztiz murgilduta; hilaren 10ean hasi eta 13an amaituko baitira horiek. Feriak elkarrengandik gertu dauden hiru kokapen izango ditu: San Nikolas, Biotz Alai Abesbatza eta Getxo Antzokia plazak, hurrenez hurren. Aurtengoan, 80 ekoizle baino gehiago banatuko dira 100 postutan. Ohikoa denez, merkatua goizeko 10:00etan hasiko da eta, gutxi gorabehera, 14:30ean itxi. Gauez, 22:00ak aldera, Algortako Biotz Alai abesbatzak jaialdia itxiko du, urtero talde honen izena duen plazan eskaini ohi duen kontzertuaren bitartez. Iaz, 19.000 lagun baino gehiago erakarri zituen San Lorentzo azokak, udal iturriek emandako datuen arabera.Goiz osoan zehar, baserriko produktu tipiko ugari erosi ahal izango dituzte bisitariek, honakoak esaterako: barazkiak, frutak, gaztak, pateak eta ahatekiak, ogia, pastelak, eztia, sagardoa, txakolina, landareak, urdaitegiko produktuak eta abar luze bat. Trikitilari eta gaitero taldeak egongo dira giroa laitzen. Horrela, bertaratzen direnek txorizoa taloarekin, sagardoa edo bestelako produktu batzuk dastatu ahal izango dituzte plaza bakoitzean egongo diren txosna banatan. San Lorentzoko merkatuan, goiz erdian, ekoizle askok nahitaezko hitzordua izango dute, Idiazabal jatorrizko deitura, barazki eta landareen ohiko lehiaketen eskutik; urtez urte partaideak horietan lehiatzen baitira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun