Portu Zaharreko jaien atarian, Algorta eta inguruetako emakume gazteek asanblada bat egin eta gero, eraso sexistak ekiditeko eta salatzeko dinamika berri bat abiatzea erabaki dute. "Emakumeonganako indarkeria kasu ezberdinak ematen ari dira. Getxon, bortxaketa saiakeren salaketa asko jarri izan dira azkenaldian, baina herritarrok ez daukagu gertaera hauen berririk. Are gehiago, horrelako gertaerak ezkutatzen ari dira, kontatzea komeni ez delakoan. Bien bitartean, emakumeok kaletik aske ibiltzeko eskubidea urratua izaten jarraitzen dugu. Kaletik gauez bakarrik goazela beldurrez eta erasotua izateko arriskuarekin egiten dugu", ohartarazi dutenez. Hartara, salaketa egiteaz gain, "jaikitzera, defendatzera eta aurre egitera" deitu dituzte emakumeak. "Tresna bat, txilibitua, eskuragarri jarri dugu, zeinaren bitartez erasoaren edota erasotua izateko arriskuaren berri emateko erabiliko den. Hori dela eta biztanleriaren ardura eta inplikazioa ezinbestekoa da, txilibitua entzundakoan aurre egiteko ardura!", adierazi dute. Erasorik edo saiakerarik egotekotan txosnetara jotzea ere premiatu dute.
Emakume Gazteen Asanbladak hiru mezu zabaldu nahi izan ditu ozenki: batetik, erasotzaileei, "jarrera horrekin ez doazela inora" adieraziz. Bestetik, horien kideei, "erasotzaileak babestuz erasotzen ari direla" esanez. Eta azkenik, "aurpegia zuritzen" ibiltzen diren instituzioei, "berdintasun planak, agerraldi publikoak… hitzak baino ez direla" kritikatuz. "Lotsa eman beharko lieke azaroaren 25ean kalera ateratzea, dauden salaketa guztien aurrean ezer egiten ez dutenean, eta bortxaketak zein bestelako erasoak ekiditeko neurririk planteatzen ez dutenean!", bota diete arduradun politikoei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun