Hiru algortarrek parte hartuko dute Bilboko Aste Nagusiko bertso saioetan
2008ko abu. 11a, 21:58
Euskal Herriko 30 bertsolari aipagarrienetakoek esku hartuko dute, BBKren eskutik, Bilboko Aste Nagusiko zortzi egunetan zehar egingo diren saioetan, aurrezki kutxa bizkaitarreko iturriek prentsa ohar bidez gaur jakinarazi dutenez. Ekitaldiotan eskarmentu handiko bertsolariek, hala nola, Andoni Egañak eta Sebastian Lisazok, hainbat lurraldetako txapeldunek eta zeresan handia emango duten bertsolari gazteenek ere zaleen gozamenerako bertsoak eskainiko dituzte. Azken horien artean, Jone Uria algortarra eta Oihana Bartra santutxuarra eta Itzubaltzetako bertso eskolako irakasle ohia arituko dira, abuztuaren 19an. Hilaren 17tik 24ra arte, saio guztiak 13:00etan egingo dira Zazpi Kaleetako Santiago plazan. Salbuespen bakarra hilaren 20a izango da, egun horretan Paya anaiek, Xabik eta Fredik, bertso-bazkaria eskainiko baitute leku berean, baina 13:30ean. Argazkian, Jone Uria, apirilaren 25ean Larrabetzuko Hori Bai gaztetxean jokatutako Ipar Uribeko VII. Bertsolari Txapelketako bigarren kanporaketan. Bera izan zen nagusi saio horretan.Horrela, hilaren 17an, Andoni Egaña, Anjel M. Peñagarikano, Sustrai Colina eta Amets Arzalluz ariko dira; 18an, Arkaitz Estiballes, Beñat Gaztelumendi, Julen Zelaieta eta Manex Agirre; 19an, Jone Uria, Miren Amuriza, Ohiana Bartra eta Maialen Arzalluz. Esan bezala, abuztuaren 20an ospatuko da Xabier eta Fredi Paya anaien bertso-bazkaria; hilaren 21ean, Uxue Alberdi, Etxahun Lekue, Onintza Enbeita eta Jokin Sorozabal izango dira prtagonista; 22an, Amaia Agirre, Jon Martin, Iratxe Ibarra eta Aitor Sarriegi; 23an, Aitor Mendiluze, Sebastian Lisazo, Jesus Mari Irazu eta Mañukorta; eta azkenik, hilaren 24an, Unai Iturriaga, Jon Maia, Maialen Lujanbio eta Igor Elorza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun