Produktuen aniztasuna eta kalitatea izan dira aurten ere San Lorentzo azokaren ezaugarri nagusiak. Barazkiak, txerrikiak eta ahatekiak, lekaleak, txakolina, euskal pastela, tradiziozko okintza, gozokiak, landareak eta loreak, gaztak, eztia eta beste hainbeste produktuak egon dira salgai merkatuan. Ohikoa denez Euskal Herri osotik etorritako ekoizleek etorri dira Algortara bere salgaiekin.
Barazki, landare eta gazta lehiaketak
Eguerdian ekoizle askok espero zuten momentua heldu da, epaimahaiak barazki, landare eta gazta lehiaketen emaitzak jakinarazi baititu. Aurten, barazki lehiaketan, Urdulizko Adela Andikoetxeak lortu du lehenengo saria, Barrikako Jose Ramon Intxaurtietaren eta Urdulizko Maria Angeles Andikoetxearen aurretik. Landare lehiaketari dagokionez, Urdulizko Maria Jesus Viteri izan da garaile. Larrondoko Emilio Mateosek eta Barakaldoko Enedina Madariagak eskuratu dute bigarren eta hirugarren saria, hurrenez hurren. Azkenik, gazta lehiaketan, Pedro Zuzuarregi (Tolosa) atera da garaile, Jose Maria Jauregiren (Asparrena) eta Xixario Zalakainen (Oiartzun) aurretik.
Aurten ere, Algortako San Lorentzo azokak emaitza itzela lortu du: guztira, 19.000 lagun izan dira goiz osoan zehar, abuztuaren 10eko jaia ospatzen duen merkatu ezagun honetan, udal iturriek adierazitakoaren arabera. Aurtengo ekitaldian Euskal Herri osoko 80 bat ekoizlek parte hartu dute eta 100 postu egon dira. Azoka honek duen salmenta kopuruak eta urtero jasotzen duen jendetzak argi erakusten dute ekitaldi hau derrigorrezko hitzordua dela baserriko produktuak erosi nahi dituen ororentzat. Ohikoa denez, San Lorentzoko jaia Biotz Alai abesbatzak eskainiko duen kontzertuaren eskutik amaituko da (Biotz Alai plaza, 22:00etan, sarrera doan). Azoka 10:00etan zabaldu dute, baino ordu hori baino lehenagorako lehenengo bisitariek gain-begiradak ematen hasiak ziren jada. Handik ordu betera, publikoak azokaren hiru salmenta guneak bete egin ditu: San Nikolas, Getxo Antzokia eta Biotz Alai abesbatza plazak, hain zuzen ere. 14:00etara arte, etengabe egin dira salmentak. Bestalde, bertoko trikitilari taldeei eta aurten jarri diren hiru txosnei esker, jai giroa nagusi izan da azokan. Hau guztia, eta goizean izan den eguraldi ona ezinbestekoak izan dira giro itzela lortzeko. Argazki gehiago ikusteko sakatu hemen. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun