Dominen atarian geratu da Leire Iglesias

Getxo Judo Taldeko kide Leire Iglesiasek eskura izan du brontzezko domina, baina azken borrokan galdu eta olinpiar diplomarekin konformatu behar izan du. Portugaleteko judokak oso lehiaketa ona egin zuen atzokoan, baina ezin izan zuen lana domina batekin biribildu. Azken errematea ematea falta izan zitzaion: brontzezko domina lortzeko borroka irabaztea. Edith Bosch herbeheretarrak, ordea, ez zion aukerarik eman. Borroka amaitzeko minutu eta erdi falta zela, Boschek ippon bat egin zion Iglesiasi, eta hortxe amaitu zen lehia, eta Portugaletekoak domina bat irabazteko zituen itxaropen guztiak. Azkenean, olinpiar diploma batekin konformatu behar izan zuen, inolaz ere gutxietsi ezin den saria. Bitartean, Neguriko Jolaseta hockey klubean ibilitako Barbara Malda eta Maria Lopez Egilaz getxoztarrek eta Rocio Ibarra bilbotarrak lehian jarraitzen dute. Gaur lortu du lehenengo garaipena Espainiako belar-hockey selekzioak, Ipar Koreari 2-1 irabazita. Lehenengo partidan, ordea, 3-0 galdu zuten Txinaren aurka. Argazkian, Leire Iglesiasek zilarrezko domina eskuratu zuen Europako txapelketan, apirilaren 12an.