Hedabide ugarik zabaldu eta Uribe Kostako Amnistiaren Aldeko Mugimenduak Etengabe bitakoraren bitartez baieztatu duenez, Zigor Goikoetxea gazte getxoztarra astelehenean deklaratzera deitu dute, Marisa Arrue Getxoko PPren bozeramaileak eta Espainiako Alderdi Popularrak aurkeztutako salaketen ondorioz. Hala ere, Fernando Andreu epailea izango du aurrean Goikoetxeak, eginbide penalak abiatu zituen Ismael Moreno Espainiako Auzitegi Nazionaleko 2. epaitegiko titularra oporretan dagoelako. Getxoko mutilari "mehatxu terroristen delitua" leporatzen diote, abuztuaren 10ean Algortan ospatu zen San Lorentzo azokan, Arrueren arabera, "bost urteko epean hil" egingo zutela esan ziolako. Bitartean, Askatasunak bere elkartasuna adierazi dio Goikoetxeari eta "salbuespen egoeraren adibide berri baten aurrean" gaudela salatu du.
Getxoko PPren bozeramaileak berak kartzelaratzea eskatu zuen aurkeztutako salaketan. Bitartean, gazte getxoztarrari fidantzapeko askatasuna emateko 2007ko urrian hartutako erabakia berraztertzeko eskatu dio Baltasar Garzon epaileari Fiskaltzak. Hilabete horretan, Uribe Kosta eskualdean egindako sarekadan atxilotu ostean, osasun arazoak direla eta, 6.000 euro ordainduta aske uztea erabaki zuen Auzitegi Nazionaleko epaileak. Mehatxu terroristen deliturako, berriz, 10 eta 15 urte bitarteko zigor eskaera aurreikusten du Espainiako Kode Penalak.
Askatasunaren salaketa oharra:
Alderdi politikoek, komunikabideek eta aparatu judizialek eskuz esku aurrera daramaten eraso berri baten aurrean gaudela salatu nahi dugu Askatasunatik. Euskal Herria salbuespen egoeran aurkitzen da eta modu honetako erasoak eguneroko ogi bihurtu zaizkigu. Salbuespen egoeraren azken adibidea da Zigorren aurkako zitazioa.
Aurrerantzean ere errepresioa salatzen jarraitzeko deia luzatzen dugu Askatasunatik. Honez gain gure elkartasuna adierazten diogu Zigor Goikoetxea gazteari.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.