Barrikako hondartzan segurtasuna bermatzea Udalaren ardura ez dela dio Ezpeleta alkateak
Barrikako hondartzako lubizien inguruan, Araba, Bizkaia eta Gipuzkoako Kostalde Mugaketa Sailak kaleratutako txostenak hedabideetan izandako oihartzunak Juan Jose Ezpeleta alkatearen erantzuna eragin du gaurkoan. Batetik, areatza isteko gomendioak “haitzak erortzen ziren inguruari buruzkoak" direla aipatu du udal agintariak, "eta ez hondartza osoari buruzkoak”. Bestalde, erabiltzaileen segurtasuna bermatzeko ardura Bizkaiko Foru Aldundiari egotzi dio, besteak beste, sorosleak, hondartzainak eta garbitzaileak aipatu erakundeak jartzen dituela argudiatuz. “Jakin nahiko nuke euskal kostaldeko gainontzeko itsaslabarretan nola bermatzen duten segurtasuna. Hondartzan segurtasuna bermatzea ez da Udalaren ardura”, adierazi du Ezpeletak. Bere hitzetan, 2007ko abuztutik ez da lubizirik gertatu. “Horregatik, jendeari gonbitea egin nahi diot hondartzara etor dadin eta arriskurik ez dagoela bertatik-bertara ikus dezaten”, aipatu du alkateak. Argazkian, Barrikako hondartzako eskaileratan jarritako babes hezia.
“Udala eta ni, alkatea izanik, konponbideak emateko gaude”, zehaztu du Ezpeletak, aurretik ardurak Aldundiarenak direla aipatu arren. "Horregatik, gaur egun hondartzak hiru sorosle eta bi hondartzain ditu, eta hauek jendeari esaten diote lubiziak gertatzeko arriskua egon badagoela, eta haitzen azpian ez jartzeko gomendioa ere egiten diete. Gainera, hondartzako sarreran kartel batek argi eta garbi dio arrisku hori dagoela", gaineratu du. Barrikako alkateak gogora ekarri du azken osoko bilkuran gaia eztabaidatu zela, “eta gehiengoak hondartza ez istea erabaki zuela". Bilera horretan alkateak eta bere udal-taldeak (EAJk) areatzako zerbitzuak mantentzeko erabakia hartu zuten, eta horiek areagotzeko aukera ere aipatu zen. “Barrikako biztanleek beren babesa eman digute, eta hondartza ez istea onartzen dutela esan digute, argi eta garbi”, jarraitu duenez. Tokiko agintariak “benetako arazoak baztertzea helburu duten eztabaida antzuak" ez zabaltzea eskatu du. Ezpeletak adierazitakoaren arabera, udal taldea Barrikako biztanleen "benetako kezkak" konpontzeko lanean ari da: "eraikuntza, etxebizitzak, erakundeen egoitzak eta beste hainbeste", aipatu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun