Banda Gaites Llacin taldeari dagokionez, 1998an sortu zen Llacin de Porrua Kultura eta Etnografia Elkarteko Tradiziozko Musika Eskolaren baitan. Elkarte horrek urteak daramatza Asturiaseko historia eta ohiturak babesten. Azken hamar urteotan taldekideen kopurua etengabe handitu da eta, gaur egun, 80 musikari baino gehiagok osatuta dago. Bere errepertorioan tradiziozko kantak eta taldekideek eginiko abestiak bildu dituzte, baita beste estilotako eragina duen doinuak ere. Areetara “Xideces” dakarte, egin duten azken lana, ohiko gaita bandaren aurrean berrikuntzaren aldeko apustua erakusten duen diskoa, hain zuzen ere. Azkenik, Alann-Bique talde galiziarrak “Noche de brujas” ikuskizuna eskainiko du. Lan horretan musika eta antzerkia uztartu dituzte antzinako kondaira keltarrak berreskuratzeko asmoz.
Bestelako jarduerak
Musika saioez gain, kaleko banden desfileak ere egongo dira jaialdian. Aurten, Frantziako Bagad Men Glaz eta Eskoziako Reading Pipe Band taldeak arituko dira. Hurrengo egunetan, beste zenbait talde gehituko zaizkie. Azkenik, beste zenbait jarduera ere egongo dira jaialdian: Bidezko Azoka (Itzubaltzetako Ibaiondo kalean), Munduko Azoka eta Kulturen Gunea (Areetako Xake plazan).
Ostiral honetan, irailak 5, Irlandako tradiziozko musika izango da protagonista nagusia Getxoko Folk Jaialdian, The Chieftains taldearen eskutik. Saioa 21:30ean hasiko da Areetako Xake plazan. Paddy Moloneyk (gaita eta whistlea), Sean Keanek (biolina), Matt Molloyk (flauta) eta Kevin Connefek (ahotsa eta bodhrana) folk irlandarraren talde ospetsuenetariko bat osatzen dute. Laukotea orain dela 45 urte sartu zen musikaren munduan eta, ordutik hona, bere herriko musikaren ikono bilakatu dira. The Chieftains Dublinen sortu zen tradiziozko musika berreskuratzeko asmotan. 1963an lehenengo diskoa kaleratu zuten, arrakasta handia lortuta. Horren ondoren 20 lan baino gehiago grabatu dituzte, horietako batzuk beste musika genero eta estilotako artisten laguntzaz. Bere jardueran irabazitako 6 Grammy sariek ondo erakusten dute nolako arrakasta lortu duen taldeak. Horrez gain, beste bi kontzertu egongo dira bihar: Asturiaseko Banda Gaites Llacin Itzubaltzeta / Romoko Santa Eugenia plazan arituko da 19:00etan eta, bertan ere, Alan-Bique talde galiziarrak joko du 23:15etik aurrera. Ohi bezala, kontzertu guztiak doakoak izango dira. Argazkian, The Chieftains talde irlandarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun