Euskalmet Euskal Meteorologia Zerbitzuaren arabera, ostiral honetan, irailak 5, haize boladak 100 kilometro ordukoak edo abiadura handiagokoak izan litezke toki irekietan, eta 80 ilometro ordukoak toki itxietan. Arrisku handiena goizaldean egongo omen da. Iragarpen horren aurrean, Eusko Jaurlaritzako Herrizaingo Sailak hainbat larrialdi zerbitzu jakinaren gainean jarri ditu, beharrezko neurriak har ditzaten. Halaber, haizete gogorren aurrean nork bere burua babesteko aholkuak eman ditu. Horrela, pertsianak, leihoak eta leiho-ateak itxi eta finkatzea gomendatu du; baita loreontziak, eguzki oihalak, eta haizeak eraman ditzakeen bestelako objektuak kentzeko ere. Kalean, berriz, jausteko arriskuan dauden erlaitz, harresi eta zuhaitzetatik urruntzeko eskatu die herritarrei. Eta bereziki obretan edo egoera txarrean dauden eraikinetatik gertu kontu ibiltzeko. Istripurik izatekotan, 112 SOS Deiak-era deitu behar da. Argazkian, haize boladek eragindako olatu batek Algortako Portu Zaharreko murrua apurtu zuen martzoan.
Ibilgailuak kontu handiz erabiltzeko eta kostaldeko bideak, zubiak eta haizeguneak saihesteko ere gomendatu du Herrizaingo Sailak. Halaber, ontzirik ez erabiltzeko eta amarrak zaintzeko eskatu du. Ildo horretan, ur kirolik inolaz ere ez egiteko nabarmendu du. Azkenik, mendian, inola ere surik ez egiteko eta kanpinetan kanpadendak ondo finkatzeko premiatu ditu herritarrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun