BI pertsona atxilotu dituzte Lutxanako etxe bat lapurtu eta jabea bahitu zutelakoan
Ertzaintzak Erandion atxilotu zuen atzo, asteartea, F.G.G. 32 urteko gizonezkoa. Berari eta abuztuaren 29an Bilbon jada atxilotu zuten S.G.A. 35 urteko emakumeari leporatzen die Herrizaingo Sailak abuztuko egun horretan Lutxanan etxebizitza bat lapurtu izana. Gainera, legez kanpoko atxiloketa delitua ere egozten diete etxeko jabea lapurreta burutzen zuten bitartean aulki batera lotuta mantendu zutelakoan. Izan ere, pasa den abuztuaren 29an, goizeko lehenengo orduan Lutxanako etxeko jabea bistaz ezagutzen zuen emakume batekin geldituta zegoen erabilitako arropa multzo bat emateko. Ertzaintzak zabaldutakoaren arabera, emakumea ez zen bakarrik agertu hitzordura eta berarekin joan zen gizonezkoak aizto batez mehatxatu zuen jabea eta sukaldean zinta isolatzailez aulki batera lotu zuen.
Ondoren, beti Herrizaingo Sailaren arabera, biktimari bitxiak eta hainbat objektu lapurtu eta diru-zorroa eta kreditu txartelak exijitu zizkioten. Jabeak hori egiteari uko egin zionez, gizonezko lapurrak aiztokada eman zion masailean. Une batean, lapurrek izan zuten huts egin batez baliatuz, biktimak lokarriak kendu eta ihes egin zuen patiora ematen duen leiho batetik. Ondoren, Ertzaintzara deitu zuen. Poliziak Lutxanako etxera heldu zirenean bertan ustezko lapur baten sakeleko telefonoa topatu zuten. Ildo horretatik ikerketak eginda, arratsalde horretan S.G.A. 35 urteko emakumea topatu eta atxilotu zuten. Atzo, berriz, ustezko gaizkidea atxilotu zuten Erandion, 32 urteko F.G.G. gizonezkoa. Biak aurrekariak dituzte eta epailearengana eraman dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun