Azken baten, kontua da unibertsitateko irakats materialak eskuratzeko sarbide libre bat konfiguratzea. Prozesuan, aurrena, unibertsitate bakoitzak OCW proiektuari atxikitu behar zaio eta, ondoren, unibertsitateetako irakasleek parte hartu behar dute haren irakats materialen argitalpenean. Hortik aurrera, material horiek jarraian argitaratuko dira, inolako murrizketarik gabe.
OCW proiektuari atxikitzeak abantaila ugari dakartza unibertsitatearentzat (erakunde gisa) eta horko ikasle eta irakasleentzat. Hala, unibertsitatea posizio hobean ipintzen da mundu mailan; ezagutzaren aurrerapenean laguntzen du, baliabide didaktikoak liberalizatuz eta baliabide horiek aurkitzeko mekanismoak eskura ipiniz; irakasleek irakaskuntzan erabiltzen dituzten baliabideak berritzera bultzatzen du; irakasleei bidea ematen die teknologia berrietara hurbiltzeko…
EHU eta OpenCourseWare
2008ko urtarrilaren 24an, Euskal Herriko Unibertsitatea OpenCourseWare Partzuergoari atxiki zitzaion. Horretarako, bulego propio bat prestatu zuen eta lehen irakasgaiak proiektuan sartu zituen. Jarraian, deialdi publiko bat egin zen, irakasleei zuzendua, indarrean zegoen ikasketa planeko irakasgaiak aurkez zitzaten, OWC irizpideak kontuan hartuz. Guztira, 82 eskaera jaso ziren, 115 irakasleen eskutik. Materia bat OCW web orrian argitaratzen denean, edonorentzat eskuragarri egoten dira irakasgaiaren inguruko irakaskuntza gida, gomendatutako irakurketa plana, ikasketa materialak, praktikak eta ariketak, autoebaluazio prozedura… Irakaslea, dagokion kontratua sinatuz, konprometitzen da materialaren originaltasuna bermatzera; era berean, bere jabetza intelektualeko eskubideak babesten dira.
Barnealdera begiratuz, proiektuari zegokion hedapena eman zaio eta hitzaldi bat antolatu da gazteleraz, “Interneten argitaratzearen lege alderdiak” izenekoa. Urte amaieran, EHUk irekian argitaratutako 23 irakasgairi dagozkien materialak izango ditu eta, 2009ko lehen hiruhilekoan, horiei 22 gehituko zaizkie. Jarraian, 2009ko deialdia egingo da, 2009. urtearen amaiera aldera 100 irakasgai izateko asmoz.
Euskal Herriko Unibertsitateak bat egin du OperCourseWare proiektuarekin. Proiektua creative commons lizentziapeko eskala handiko argitalpen elektronikoko ekimen bat da eta horren helburu nagusia da arlo guztietako irakats materialak modu libre, erraz eta koherentean eskuratzen ahalbidetzea, mundu osoko ikasleek eta irakasleek doan erabil ditzaten. OpenCourseWare proiektua 2000. urtean sortu zen MITen, Massachussets-eko Teknologia Institutuan, haren hezkuntza eskaintza irakaskuntza birtualaren bidez hedatzeko bitarteko gisa. Urte haren amaieran, MITek bere ikastaroak, irakats materialak eta proposamen akademikoak argitaratzeko erabakia hartu zuen. Mundu osoko hainbat eta hainbat unibertsitatek bereganatu egin zuten, beranduago, proiektu hori eta, dagoeneko, mundu mailako partzuergo bihurtu da, eduki irekien ekoizpenera, koordinazio eta hedapenera bideratutako partzuergoa hain zuzen. Aurretik Nafarroako Unibertsitatea eta Deustuko Unibertsitatea OCW proiektuko kideak ziren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun