Arratsaldeak bero-hodeiak sortu, trumoi lainoak loditu eta euri zaparrada gogorrak izango dira han-hemenka. Hori izan da Euskalmet Araba Bizkaia eta Gipuzkoako Euskal Meteorologia Agentziaren arabera, gaur arratsalderako izango dugun eguraldia. izan ere, atzo bezala gaur ere giro nahasia eta ezegonkorra nagusituko da, eta "arratsaldean zehar bero-hodeiak sortzen eta garatzen joango dira eta aroak beltzera egingo du; trumoi lainoak loditzen joango dira eta zaparradak utziko dituzte. Zaparrada hauek, han-hemenka gogorrak izan daitezke" iragarri dute Euskalmeteko arduradunek. Gainera, haizeak 70 kilometro orduko abiadura hartu ahal izango du. Hori dela eta, 30 litro orduko ekaitz eurien eta horiek eragindako uholde txikien arriskuaz ohartarazi du Herrizaingo Sailak. Atzo, 15 litro batu ziren hainbat gunetan eta Uribe Kostan arazo bakarra Avanzadan jaso zen, goizeko 10:30ak arte auto ilara handiak sortu baitziren Getxo eta Erandio arteko ibilbidean. Argazkian, pasa den ekainaren 1eko uholdeak Algortako Getxo I institutu parean.
Herrizaingo Sailak larrialdi zerbitzuak egoeraz ohartarazteaz gain, herritarrei autobabeserako hainbat neurri hartzea eskatu die. Uholdeak izan ohi dituzten guneetan, autoa garajetik ateratzea, lonja eta saltokiak babesteko behar beste neurri hartzea eta adi egotea gomendatu dute. Era berean, irratiz zein telebistaz egoera meteorologikoaz eta mandatarien gomendioez informatuta egotea aholkatu dute. Ezinbestekoa ez bada, euri gogorren pean ez gidatzea eta egitekotan, autopista edo errepide nagusietatik egitea, ureztutako guneak zeharkatu gabe eta errepideko ur maila eta mendi guneetan balizko lurjausiak aurreikustea eskatu du Herrizaingo Sailak. Autoa geratzekotan erreken ubidetik gertu ez lagatzea ere aholkatu dute. azkenik, edozein larrialdiaren aurrean, 112 Sos Deiak telefonora deitzea eskatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun