Bizkerreko emakumeen hutsuneari buruz, Eneko Mezo Getxo Futbol markako koordinatzaileak egoarekiko bere "harridura" adierazi zion UKBERRI.NETi eta Jose Maria Bravo Bizkerre taldeko presidenteak barne komunikazio arazo bati leporatu zion emakumeen presentzia eza: "neskak hemen egon beharko lirateke, gaur da eta aurkezpen eguna. Agian ez dira etorri pentsatuz gaur futbol maskulinoa aurkezteko eguna zela, baina ez zen horrela. Hortaz, beste aurkezpen bat egin beharko da emakumeak aurkezteko. Udalarekin hitz egingo dut horretaz". Bravok gogoratu zuenez, orain dela 2 urte, Iñaki Zarraoa alkatea zela, aurkeztu zen talde femeninoen Getxo Futbol marka, "baina orduan ez ziren jokalariak aurkeztu".
Ekimenean, Eneko Mezorekin batera anfitrioi lanak egin zituzten Luis Sanchez Getxo futbol taldeko presidenteak, Endika Guarrotxena Athletic-eko jokalari ohiak eta Imanol Landa Getxoko alkatea berak. Landaren arabera, atzokoak gogoratzeko eguna izango da, aurrekoa eta gerokoa guztiz ezberdinak izango baitira. Horrela, azken hiru hamarkadetan beherantz egin duen futbol getxoztarra bitarteko eta lan tekniko egokiaren bidez berriro berpiztuko den bere konfiantza azaldu zuen.
Ehunaka jarraitzaile bildu ziren atzo Fadurako Udal Futbol zelaian Getxo Futbol markaren aurkezpenean jokalariak ikusi, animatu eta txalotzeko. Horien aurrean agertu ziren irribarretsu Galea, Getxo, Bizkerre eta Neguri zein eskolarteko taldeetako 400 bat tekniko, zuzendaritzako kide eta gizonezko futbolari, gehienak Getxo markako elastiko gorri iluna eta praka txuria jantzita. Gainera, megafoniatik jakinarazi zuten Iturgitxi futbol taldeak ere bat egin duela berriki ekimenarekin eta laster kamiseta gorri iluna jantziko duela. Era berean, Arenas ehun urteko taldeak eta Romok zein Arraultzaldeonek ateak irekita dituztela ere nabarmendu zuten. Gauzak horrela, Bizkerre femeninoaren eta Bizkenesken jokalarien hutsunea nabarmena izan zen eta publikoak ikusi zituen neska futbolari bakarrak pilotari ostikadak emateko futbol zelaira jauzia egin zuten bizpahiru urteko neska-mutilen artean bilatu behar izan zituen. Bestalde, eguna borobiltzeko jokatutako lagun arteko partidan Bilbao Athletic 3 eta 2 nagusitu zitzaion Getxori. Argazkian, Galea eta Bizkerreko hainbat jokalari atzoko aurkezpenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun