Asteazkenean Auzitegi Nazionalean agertzeko zitazioa jaso dute Sarasketa eta Terronesek

Mitxel Sarasketa getxoztarrak eta Jagoba Terrones berangoztarrak zitazio bana jaso dute datorren asteazkenean, hilak 17, Espainiako Auzitegi Nazionalak makroepaiketak egiteko erabiltzen duen Casa del Campo delakoan agertzeko, Etengabek jakinarazi duenez. Zitazioetan aipatzen ez duen arren litekeena da deialdia 33/01 auziaren epaia jakinarazteko izatea. Auzi horretan, Amnistiaren Aldeko Batzordeen, Askatasunaren, Senideen eta Behatokiaren 27 lagun epaitu zituzten, beren militantzia dela eta "erakunde armatuko" kide edo laguntzaile izateko akusaziopean. Maitane Mendez durangarra eta Jordi Arredondo bilbotarrarekin gertatu bezala, Sarasketa libre uzteko eskatu zuen fiskalak, zazpi urteko prozeduraren ostean bere aurkako froga bat ere ez zuela. Terronesen aurka, berriz, 10 urteko espetxe zigorra eskatu dute. "Berria" egunkariaren arabera, dagoeneko 33/01 auziko 24 lagunek jaso dute zitazioa. Argazkian, epaiketako irudi bat / Etengabe.