Guztira, 20 postu izango dira azokan eskaintza zabala eta desberdina eginez. Hori horrela, ortuariekin Leioako Esther Izquierdo izango da, gaztarekin Orozkoko Malatsa eta Mendatako Erreketa, Artzentaleseko Pedro Galarreta eztiarekin izango da eta Gamizeko Pilar Etxeandia txakolinarekin. Ogia eta pastela, bestetik, Larrabetzuko Asier Bengoak eta Orozkoko Maria Aldaiek jarriko dute, txerrikiak Loiuko Jose Luis Urrutikoetxeak jarriko ditu, eta Maria Jesus Viteri leioaztarra izango da loreak saltzen.
Azkenik, beste mota bateko postuak ere izango dira eskaintza ahalik eta zabalena izateko; Zornotzako Jose Antonio Ares eskuz egindako egurrezko produktuak izango ditu salgai, Santoñatik Rakel Loiolak antxoak ekarriko ditu azokara, eta Bilbotik etorriko zaizkigu erroskilen postuak ere.
Baserriko produktuen 20 saltoki izango dira bihar Udondoko Nekazaritza Azokan
Baserriko produkturik onenak, bihar, Udondoko VII Nekazaritza Azoka, urtero bezala, Udondoko jaien barrena ospatuko da oraingoan ere. Guztira, Leioako Udaletik jakinarazi dutenez, 20 postu izango dira "gure baserrietako produkturik gozoenak eskainiz, besteak beste, gazta, eztia, ortuariak, txakolina, ogia eta pastela, txerrikiak eta loreak". Azken urteetan gertatu izan bezala Udondoko Agirre Lehendakaria plaza baserritar giroan murgilduko da bihar nekazaritza azokarekin, eta horrekin batera herriko zein inguruetako beste herri batzuetako bisitariak ere izango dira Leioan baserriko produktuak dastatzeko eta erosteko. Era berean, azoka hauetan ohikoa den txosna ere izango da Udondon, bertan bisitariek hamaiketako gozoa jan ahal izango dute taloa eta guztiz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun