Guztira, 16 euskal herritar daude Pekingo Paraolinpiar Jokoetan lehiatzen. Javier Otxoaz gain, txirrindularitzan dabiltza Aitor Oroza bilbotarra, Amador Granado gipuzkoarra eta Victor Hugo Garrido venezuelarra, aspaldi Bilbon bizi eta Erandion oso ezaguna dena. Igeriketan, berriz, Eztitxu Vivanco arrangoiztarra, Arkaitz Garcia gipuzkoarra, Sandra Gomez nafarra, Sara Carracelas oreretarra, Ana Rubio irundarra eta Richard Oribe donostiarrak osatzen dute euskal flota. Bestalde, Yolanda Martin gipuzkoarra eta Santiago Pesquera nafarra Boccian jarduten dute. Judoari dagokionez, Sheila Hernandez santurtziarra eta Laura Garcia iruindarra dira euskal ordezkariak. Atletismoan euskal herritar bakarra dabil Pekin, Javier Conde bilbotarra, alegia. Bestalde, aspaldi Madrilen bizi bada ere, Jose Fernando Garcia bizkaitarrak ere lortu du Pekinen egotea, goalball kirolean. Azkenik, Juan Manuel Uruñuela arabarra saskibaloi partidetan arbitro izaten ari da.
Dagoeneko, Javier Otxoak lortutako urrezkoa barne, bost dira euskal kirolariek lortutako dominak. Aurretik, Yolanda Martinek eta Santiago Pesquerak zilarra eskuratu zuten neska-mutilen bikotezko Boccia proban eta Richard Oribek estilo libreko 200 metroko igeriketa proban txapeldun gelditu zen. Gainera, 100 metroetako zein errelebotako 4x50 metroko kategorietan zilarra eskuratu zuen.
Javier Otxoa txirrindulari berangoztarrak urrezko domina irabazi du errepideko erlojupean Pekingo Paralinpiar Jokoetan. Domina horrekin, pista probek utzitako zapore txarra kandu ahal izan du Otxoak. Izan ere, jazarpenean Atenasen lortu zuen zilarrezko domina eskura izan zuen arren azkenean kanporatu egin zuten. Era berean, erlojupekoan laugarren sailkatu zen, brontzeko dominatik bi segundutara. Pistan jazotakoaren ostean errepidean domina lortzeko ahalegin guztia egingo zuela adierazi zuen berangoztarrak eta agindutakoa bete egin du. Batez beste 39,742 kilometro orduko abiadan egin du 24,8 kilometroko erlojupeko ibilbidea, lasterketa bukatzeko 37 minutu eta 26 segundo behar izan dituela. Pistan nagusitu den Darren Kenny britainiarrari 11 segundoko abantaila atera dio Otxoak, pistarekiko errebantxa argia lortuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun