Ondizko jaien errepikapen eguna aitzakia hartuta, urteroko bakailao txapelketa famatua ospatuko da igande honetan, hilak 14, Leioako auzo horretan. Leioako Udalak jakinarazi duenez, "bertan inguruetako sukaldaririk onenak bilduko dira lehen postua eskuratu nahian Bizkaiko erara bakailao txapelketa gastronomiko honetan". Badaezpada ere, antolatzaileek sari ugariren bidez erakarriko dituzte hainbat lekuetako sukaldariak. Horrela, lehenengo 30 sailkatuek sari segurua eskuratuko dute. Gainera, lehenengo hamarrek garaikurra eta sari ekonomikoa ere izango dute. Kazola irabazlearen jabeak Leioako sari berezia hartzeaz gain, 200 euro jasoko ditu, bigarrenak 170, hurrengoak 120, 100 eta 90, hurrenez hurren eta seigarrenetik 10.era 60na euro.
Jai gastronomikoa goizeko 8etan abiatuko da, ordu horretan 10 euroko izen-ematea ordaindu ostean, parte hartzaileen lur-zatiak zozketatuko direlako. Lekua hartu eta gero sukaldariek beren kazolak prestatzen hasiko dira, horretarako antolatzaileek egurra banatuko dute nahiz eta bakailaoa egurrez, gasez, landare-ikatzez edota beste elementu batekin egin daitekeen, sukaldarien esku. Aukeran egongo ez dena bakailaoa eta saltsa non egitea da. Izan ere derrigorrezkoa da jakiak jai gunean prestatzea, guztien begi bistan. Hori kontrolatzeko, antolatzaileak goiz osoan zehar ibiliko dira kazolak aztertzen. Norbaitek araua urratuz gero lehiaketatik kanpo utziko duteneko abisua eman dute antolatzaileek. Kazolen izen-ematea, 11etatik 11:30ak arte egin ahal izango da, kazola bakoitzeko 6 euro ordaindu behar izango dela. Aurkeztu, berriz, 13:30ak aldera aurkeztu ahal izango dituzte, epaileek aztertu eta dasta ditzaten. Azken erabakia, arratsaldeko 6etan jakinaraziko da. Ondoren, Jo Ta Hanka erromeria taldearekin gozatzeko aukera izango dute bildutakoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun