Bihar, larunbata, eta etzi, igandea, Euskal Jaia izango da Sopelan. Musika, dantzak, gastronomia eta herri kirolak egongo dira, besteak beste. "Euskal ohiturak bizi nahi dituztenentzat saihestu ezin den hitzordua izango da", udal iturrien arabera. Larunbat goizean, udaletxe ondoan kokatutako Baserritarren Azokako salmenta-postuak irekiko dira, 10:00etan, ortuko ekoizkin onenak ezagutarazteko: barazkiak, frutak, lekak, gaztak, loreak, eztia eta pastelak dastatu eta erosteko aukera egongo da. Horrekin batera, goiz osoan zehar txalaparta jotzen ikasi ahal izango da. Eguerdian, berriz, gazta, barazki, lore eta fruitu lehiaketen sari banaketa izango da. Ondoren Uribe Bazterra Bandaren kontzertua hasiko da. Arratsaldean erromeria eta dantzak izango dira Patxi eta Konpainia taldearen eskutik. Honekin batera, aipatu azken orduko emanaldia lotu dutela Euskal Jaiaren lehenengo egunerako. Lehen aipatu musika saioaren ostean, Maddi Oihenart (argazkian) kantari zuberotarrak abestuko du, 22:00etatik aurrera.
Igandean, Zirri Marra Margo Lehiaketa eta Fermin eta Eusebio Sukalki Txapelketa egingo dira. 13:00etan azken horren txapelketaren sariak banatuko dira eta arratsaldeko 17:00etan margo lehiaketarenak. Gainera, txistu kontzertua, perkusioa eta metal boskoteek lagundurik, umeentzako animazioa egongo da Txanogorritxu Rock dantzaldiaren eskutik. Herri kirolei dagokionez, Bizkaiko II. Aizkolari Opena izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun