Bizkaiko eskifaia Eneritz Alkorta ondarrutarra entrenatzailearen aginduetara dago, Irantzu Pardavila plentziarraren laguntzaz. Biek lan gogorra izan dute abuztutik aurrera Kontxako Bandera prestatzen, talde ezberdinetako kideak koordinatzen. Patroia berriz, Oihana Goikoetxea izango da.
Aurrean, 1,5 itsas-milla izango dute, 2.778 metro, ziaboga bakarrarekin. Plentziako trainerakoak olatuz beteriko itsasoan ondo murgiltzen dira eta uste dute horrelako uretan igandera heltzeko aukera asko izango dituztela, gainera horrek trainera katalanei aldapa gora egingo litzaiekeela jakitun. Horregatik, Galiziarren lanarekin adi egongo dira.
Gizonezkoak ez jaisteko lanean
Arkoteko emakumeek aurrerantz egiten duten bitartean, gizonezkoek nahiko lan izango dute aste hauetan entrenatzen, hilaren 20an eta 21ean jokatuko duten "play-off"-en TKE San Miguel Ligako plaza mantentzeko. Izan ere, jaisteko postuetan gelditu ostean, 2005ean bezala erlojuaren kontrakoan aritu eta Laredo, Kaiku eta Meirako tripulazioei abantaila atera behar izango diete, gutxienez haietako bi aurreratuz. Bermeon eta Portugaleten horrelakorik lortu ezean, KAEn sartuko lirateke plentziarrak.
Arratsaldeko 6etan abiatuko da I. Emakumeen Kontxako Bandera eta protagonistetako bat Plentzitarra izango da, Arkote-Dermitek markapean jardungo duena. Bertan, Arkote, Raspas, Ondarroa, Elantxobe eta Portugaleteko arraunlariak jardungo dute batera, deustuarrek trainera konbinatuari uko egin ziotela. Gainera, Bizkaiko trainera bakarra izango da. Beste parte hartzaileak Tolosaldea, Hondarribia eta Zumaia-Getaria gipuzkoarrak; Kantabriako Astillero; Cabo da Cruz, Chapela eta Meira taldeek osatutako Galiziako konbinatua; eta Colera eta Badalona katalanak. Lau talderik azkarrenek bihar goizeko 11etan lehiatuko dira I. Emakumeen Kontxako bandera irabazteko. Neskek gaur sailkatzekotan 2005ean Arkotek lortutako balentria errepikatuko lukete, ohorezko txandan sartuta. Eta igandean historia egin lezakete. Argazkian, Astillero kontuan izateko arerioa izango da / Ermuko Pilotazaleak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun