Areetako gazte bat atxilotu eta Uribe Kostako beste lagun bat zauritu zituen atzo Ertzaintzak, Donostian, Amnistiaren Aldeko Mugimenduak deitu eta Eusko Jaurlaritzako Herrizaingo Sailak debekatutako manifestazioan, errepresioaren aurkako erakundeak Etengabe zein Askatu.org agerkari digitalen bitartez zabaldutakoaren arabera. Jakinarazi zutenez, Asier Sellan da atzemandako mutila. Guztira bost lagun izan ziren atxilotuak eta dagoeneko aske dira guztiak. Herrizaingo Sailaren arabera, atzo ilunabarrean utzi zituzten libre. Bostak, ordea, epailearen aurretik noiz pasatuko geratu dira; deia jasoko dute. Beste seigarren baten aurka, berriz, salaketa aurkeztu du Ertzaintzak ustez agenteak iraintzeagatik. Arratsaldeko ordu biak aldera ehunka lagun Boulevard-eko oinezkoentzako aldean ibiltzen hasi ziren, antolatzaileek hasiera batean iragarritako kontrako noranzkoan. Bertan ziren dozenaka ertzain martxaren hasiera ekiditeko. Kargatu ondoren Donostiako Alde Zaharretik sakabanatu ziren manifestariak eta liskarrak hasi ziren. Zaurituak eta atxilotuak eragin zituen ertzainek buruturiko kargek. Kalez jantzitako polizia batek pistola atera eta airera hainbat tiro ere bota zituen Konstituzio plazan. Argazkian, zaurituetako bat belarritik odola dariola / Askatu.org.
Amnistiaren Aldeko Mugimenduak salatu duenez, manifestazioa behin deseginda, alde zaharreko kaleetan, gutxienez 9 herritar "bortizki jipoitu" zituzten ertzainek, "hauetako bati klabikula hautsi diotelarik, kolpeka eta ostikoka". Bestetik, Konstituzio plazan kalez jantzita zioan polizia batek bere pistola atera eta gutxienez 8 tiro bota zituen airera. Hainbat hedabidek zabaldutakoaren arabera, agirika egin zion jendetzak. Halaber, Espainiako polizia zela diote albiste agentziek, AAMk ertzaina zela adierazi arren. Ondoren Brigada Mugikorreko ertzainak ibili ziren bala-zorroak jasotzen, lekukoek diotenez. Honez gain, gomazko pilotek zauritu bat baino gehiago eragin zuten. "Hauetako bat pilotak zuzenean buruan jo zuen eta belarritik odola zeriola eraman zuten anbulantzian ospitalera", AAMk adierazi zuenez. Hartara, amnistiaren aldeko erakundeak gogor salatu du "beste behin ere Ertzaintzak erabili duen bortizkeria euskal preso politikoen oinarrizko eskubideak aldarrikatzen zituen manifestazio honen aurka". "Herritarrak gorrotoz nola jipoitu dituzten ikusi dugu, nola atxilotu dituzten, nola beldurtu dituzten. Manifestazio eskubidearen aurkako eraso argia izan da gaur Donostian ikusi duguna", atzo adierazi zutenez. EAJ eta Eusko Jaurlaritza osatzen duten alderdiak euskal preso politikoek bizi duten egoeraren aurrean "itsu, mutu eta gor" egoteaz gainera, hori salatu nahi duten herritarrak nola jotzen dituzten ikusteak "benetako lotsa" ematen diela aitortu du AAMk. Euskal Autonomia Erkidegoko lehendakari Juan Jose Ibarretxe jauna berari "milaka herritarren aurka Ertzaintzak burutu duen karga bortitz hau" babesten al duen galdetu diote.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun