Joan den larunbatean, goizeko 7ak baino minutu batzuk lehenago, Sopelan (BI-2122 errepidean) jazotako istripuaren lekuko izan ziren pertsonen laguntza eskatu du Eusko Jaurlaritzaren Herrizaingo Sailak, ezbeharraren zergatiak argitzeko asmoz. Atxabiribil hondartzako bidegurutzean izan zen okerra, gasolindegiaren ondoan. Istripuan, Peugeot ziklomotor baten gidaria zauritu zen auto baten aurka talka egin eta gero. Auto gidariak ihes egin zuen eta biktima, 37 urteko gizonezko getxoztarra, Gurutzetako ospitalera eraman zuten pronostiko erreserbatuko zauriekin. Gertatutakoa argitzen lagun dezakeen daturen bat emateko Getxoko Ertzainetxeko Argiketa Sailaren telefono zenbakira (944 063 420) deitzerik badago. Bestalde, egun berean, baina eguerdiko 13:00ak aldera, Leioako 57 urteko gizonezkoa zauritu zen Bilbon izandako istripuan. Azkenik, igandeko 19:55ak aldera, I.B.O. gizonezkoa Gurutzetako ospitalera eraman behar izan zuten, Erandion (N-637) gertatutako ezbeharrarengatik. Argazkian, istripu bat Algortako Getxo I institutu aurrean, 2005eko ekainean.
Bilboko istripua A-8an jazo zen, Balmasedako irteeraren parean, Kantabriarako noranzkoan. Bi autok talka egin zuten eta ondorioz, Leioako 57 urteko gizonezkoa Basurtuko Ospitalera eraman zuten maila ezberdinetako zauriekin. Errepideko hiru erraietatik bi itxi egin behar izan zituzten. Horrek, auto-ilarak eragin zituen 14:15ak arte. Erandion, berriz, oraindik ezagutzen ez diren arrazoiengatik, irauli egin zen I.B.O. pilotukide zihoan Opel Corsa autoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun