Ezker abertzaleak eta herritarrek Getxoko Udalari aurkeztu zizkioten galdapenek emaitzarik lortu ez eta, azkenean, Alango kaleko hiltegi zaharra bota egin dute. Herenegun hasi eta gaur eguerdian amaitu du bere lana hondeamakinak, metro batzuk aurrerago tokiko agintariak eta Eusko Jaurlaritzakoak Algortako osasun zentro berria inauguratzen ari ziren bitartean. Ez dira gutxi izan, tristura aurpegian antzematen zitzaiela, triskantzari begira espaloian gelditu diren lagunak. Izan ere, XIX. mendeko eraikinak hiltegi izateari utzi zion aspaldi eta, horren ostean, kirola egiteko egokitu zuten. Ez dira gutxi izan urteetan zehar bertan saskibaloian, pilotan eta frontenisean aritu diren auzoko neska-mutilak. Besteak beste, babes ofizialeko 38 etxebizitza egiteko erabiliko du orubea Udalak. Argazki gehiago hemen ikus daitezke.
Getxoko Udal Gobernu Batzordeak urtarrilean eman zion hasierako onespena Getxoko Elementu Adierazgarriak Babesteko Plan Bereziari. Horren harira, 2005ean egin bezala, Algortako Alango kaleko hiltegi zaharra ere babestea eskatu zuen ezker abertzaleak eta horretarako galdapenak aurkezteko kanpaina abiatu. Izan ere, 2001eko Hirigintza Antolamendurako Plan Orokorrak (HAPO) ez zuen elementu adierazgarritzat hartu XIX. mendeko eraikina.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun