Getxoko Udalbatzak onartutako bi mozio eta Gasteizko Legebiltzarrak baietsitako legez kanpoko proposamenari jarraiki, Ibaizabalgo eskumalderako ospital berria Getxo udalerrian eraikitzea, aurrez aurre eskatu dio Gabriel Inclan Osasun sailburuari Marisa Arrue tokiko PPren bozeramaileak. Algortako Alango kaleko osasun etxea inauguratzeko ekitaldian izan dira biak (argazkian). Zentro berri hori zabaldu izana "pozik" hartu du zinegotzi popularrak, "Bidezabal eta Areetako anbulatorioak gainezka zeudelako". Hala ere, Uribe Kostarako ospitala udalerrian jartzea "getxoztar gehienen nahia" dela agertu dio Inclani Arruek; Urdulizen egitekoa den Sendatze Handiko Ospitale Zentroa "nahikoa ez" delakoan. Osasun arduradunak, baina, "beharrizanez, inolako azterketarik eskuan izan gabe hitzegitea" egotzi dio Getxoko PPren buruari. Arrueren arabera, "400 ohedun ospitala" (Urdulizkoan ez da oherik egongo) behar du eskualdeak eta "Getxo udalerrian inon baino hobeto".
Batetik, "horrelako gaiei buruz hitzegitea Eusko Jaurlaritzako Osasun Sailari" dagokiola, eta ez udal erakunde bati, erantzun dio Arrueri Inclanek. "Bestela Autonomia Estatutua irakur dezatela", aurpegiratu dio. Bestalde, osasun zerbitzu eraginkorra izateko "gakoa lehen arreta hobetzea" dela aipatu du sailburuak. Horren adibide jarri du gaur inauguratutako osasun zentro berria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun