Euskal Herriko Unibertsitatearen adierazpena:
Gaur goizaldean Luis Conde de la Cruz jauna hil eta hainbat pertsonari zauri kontuzkoak eragin dizkien atentatua dela eta, Euskal Herriko Unibertsitateak honako adierazpen publikoa egin nahi du:
Lehenengo eta behin, bere doluminik handiena eta bere elkartasuna helarazi gura dizkie hildako pertsonaren senide, lagun eta lankideei.
Bigarrenik, jende aurrean adierazi nahi du erabat gaitzesten duela atentatu hau. Ez dago inongo argumentaziorik, ez politikorik ez sozialik ez bestelakorik, gizaki bat hiltzea zuritu dezakeenik. Pertsona guztiek daukate bizitzeko eskubidea, eta eskubide hori ezin daiteke inolaz ere kolokan jarri bizitzak berez daukan balioaz kanpoko gorabeherengatik. Unibertsitateak, humanismoaren balioetan, tolerantzian eta iritzien trukean oinarritutako erakunde akademikoa den aldetik, ez du indiferente geratu nahi honelako gertaeren aurrean, jakin badakielako hitzez eta arrazoiaz borrokatu behar dituela halakoak, eta halaxe egiteko premia sentitzen duelako.
Azkenik, UPV/EHUk bat egiten du datozen orduetan antolatuko diren gaitzespen-ekitaldiekin, eta, bereziki, dei egiten die guztiei atentatu hau gaitzesteko eta biktimei elkartasuna adierazteko unibertsitateko campusetan dagoeneko antolatu diren elkarretaratzeetan parte har dezaten.
Leioa, 2008.eko irailaren 22a.
Gaur goizaldean Luis Conde de la Cruz Espainiako Armadako brigada hil eta hainbat pertsonari zauriak eragin dizkien atentatuaren inguruko adierazpena plazaratu du EHUko Errektoretzak. Batetik, doliminak eta elkartasuna adierazi dizkiote hildako pertsonaren senide, lagun eta lankideei Euskal Herriko Unibertsitateko arduradunek. Bestetik, atentatua gaitzetsi dute. Eta azkenik, hori gaitzesteko eta biktimei elkartasuna adierazteko unibertsitateko campusetan dagoeneko antolatu diren elkarretaratzeetan parte hartzera deitu dute. Adierazi dutenez, "ez dago inongo argumentaziorik, ez politikorik ez sozialik ez bestelakorik, gizaki bat hiltzea zuritu dezakeenik. Pertsona guztiek daukate bizitzeko eskubidea, eta eskubide hori ezin daiteke inolaz ere kolokan jarri bizitzak berez daukan balioaz kanpoko gorabeherengatik". Argazkian, EHUko jarduneko errektore Juan Ignacio Perez Iglesias.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun