Areetan emandako prentsaurrekoaren hasieran, "murriztu edota ezabatu daitezkeen gastu" batzuk aletuz joan da Arrue: komunikazio eta protokolo partida, PPren aburuz %45 igo dena 2007n; eguneroko gastuen %12,6ko igoera; San Inazio eguneko txirrindularitza lasterketarako areken jaitsieran "urtero eta egun horretarako soilik" erabiltzen diren 30.000 euroak, PPk aspaldi "betiko baliagarria izango litzatekeen areken jaitsiera eskatu zuen arren"; eta, azken adibidetzat, popularrek hainbatetan salatu duten eta Udalbatzak konpontzeko eskatu duen Areetako Xake plazako karparen afera. Arrueren arabera, urtero 300.000 euro xahutzen dira bertan.
Aipatu gastu joera hori betidanik kritikatu badute ere, popularrek krisialdi egoeran inoiz baino gehiago "berraztertzeko gastuak" direla uste dute. Horren ordez, "baliabide horiek lanpostuak sortuko dituzten ekimenetara eta inbertsioetara bideratzea" eskatu dute. Norabide horretan gogoratu dituzte zergak eta tasak murrizteko egindako proposamena eta baita PSE-EEk zinegotzien soldatak murrizteko aurkeztuko duen mozioa ere. Eta biak ontzat eman badituzte ere, krisialdiari zuhurtziaz jokatzeko unea dela iritzi diote: "krisialdiak zenbat iraungo duen ez dakigu. Aldiz, beherantz doan gure hirugarren sektorea berrindartzeko non inbertitu behar dugun jakiteko premia dugu. Era berean, aurreztu ere egin beharko dugu, bada ez bada ere", esan du Arruek.
Getxoko Udalaren gastu publikoa eta inbertsioak aztertuko dituen Udal Gastu Publikoaren Ikerketa Bulegoa sortzea eskatu du gaur goizean Marisa Arrue Getxoko PPren bozeramaileak. "Une zailetan gaude, krisialdian. Erakundeok eredu izan behar gara eta gastuak krisialdira egokitu" esanez azaldu du Arruek balizko batzordearen egin beharrekoa: "auzokide guztiek gerria estutu behar badute, Udalak ere egin beharko du eta Udal Gobernua horretaz jabetu denetz ez dakigu". PPk ezabatzekoak diren hainbat gastuen aurkako neurriak aipatu eta PSE-EEk edota EAJren Udal Gobernuak egindako beste neurriez gogoratu egin da, jeltzaleak krisialdiari aurre egiteko "ezinean" dabiltzala baloratuz. Horregatik, alkatea eta Udalbatzako aulkietan jesartzen diren alderdiak batuko lituzkeen batzordea proposatuko dute mozio bidez biharko Udalbatzan: "zorrotzak izan behar garelakoan gaude eta guztion artean non moztu eta non gastatu ahal dugun ikertu behar dugu".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun