Erandio eta Leioako auzoen arteko autobusa jartzea eztabaidatuko dute bihar Bizkaiko Batzar Nagusietan
2008ko ira. 25a, 22:44
Ekainaren erdialdean arauz besteko proposamena (pdf) aurkeztu zuen Bizkaiko Batzar Nagusietako PSE-EEk, Bizkaiko Foru Aldundiari Erandio eta Leioa arteko garraio zerbitzua jar dezala eskatuz, udalerrietako erdigunetik urrun dauden auzoei zerbitzu emateko asmoz. Horrenbestez, ostiral honetan, irailak 26, eztabaidatuko dute Azpiegitura, Garraio eta Hirigintza Batzordeak Bilbon izango duen bilkuran. Alderdi konstituzionalistaren ustez, “Batzar Nagusien osokoak otsailaren 20an erabaki zuen Garraio Publikoa Zabaldu eta Berregokitzeko Planean sartu behar dira, beste batzuen artean, behar izan daitezkeen zerbitzu guztiak. Horretara, bada, plan horretan aztertu behar da udalerrien arteko autobus linea bat jartea, hain zuzen ere, beste garraiobide batzuekin koordinaturik, erantzuna eman diezaion Erandioko eta Leioako auzoetakoek aspaldiko urteetatik hona egin duten eskariari". Argazkian, Otermin, eskuinean, aurreko udal hauteskunde kanpainan, Leioan.Juan Otermin PSE-EEko batzarkideak adierazitakoaren arabera, "beste gauza batzuen artean, ezaugarri beretsua dute" Leioak eta Erandiok. Hain zuzen ere, udalerriotako biztanleak zenbait auzoetan sakabanaturik bizi direla: Altzaga, Astrabudua, Arriaga, Erandio Landa, Goiherri, Lutxana-Enekuri eta Asua-Lauroeta, Erandion; eta Elexalde, Artatza, Sarriena, Lamiako-Txopoeta, San Bartolome, Ondiz, Txorierri eta Pinueta, Leioan. Metro Bilbao egin zenean Euskotrenek artean zeukan ibilbidea erabili zenez herriotan, metroaren geltokiak herrigunerik handienetatik urrun geratu ziren, Erandioko Altzaga eta Lutxana auzoak eta Leioako Lamiako auzoa kenduta, Oterminen hitzetan. Hartara, "udalerri bietan antzekoa denez egoera, eta udalerri biotan urrunen eta sakabanaturik dauden auzoak lotzeko autobus linea bat egin ezkero auzoen mugikortasuna hobetu eta, beraz, bizi kalitatearen onerako izango litzakete", Bizkaiko Batzar Nagusietako PSE-EEren aburuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun