Irigoienek alderdia batzeko borondatea erakutsi zuen Bilboko bilkuran, kanpora begira "indarrak biderkatzeko" bide bakarra delakoan. Ojinagak, berriz, komunikatu bat zabaldu zuen ostiralean, Batzen eta Encuentro Plural Alternativo taldeak oinarri duten Berpizten sektore kritikoaren zerrenda "jende osasuntsua eta prestatua" dela, "koherentea eta uste sendoak dituena". Bere hitzetan, "barne demokrazia eza eta Ezker Batua euskal ezkerrean birkokatzeko beharra" izan dira oinarriak, bere zerrendak "bataila" eman zezan. Ojinagak salatu zuen alderdiko errolda "puztu eta manipulatu" direla, eta gogoratu zuen alderdi kritikoak udan jarritako salaketa guztiak tramitatzeko onartu dituztela epaitegietan.
Era berean, EAEko Ezker Batuaren Batzar Nagusia burutu ondoren EBren zuzendaritzak "arduraren bat zuten kritiko guztiak" baztertu dituztela salatu zuen Ojinagak: "erakundeko estruktura nagusitik zein lurralde estrukturatik diferentzia ezabatu egin dute".
Jose Vicente Ojinaga Sopelako EBren zinegotziak galdu egin ditu Bizkaiko Ezker Batuan egindako barne hauteskundeak. Alderdi federalistak larunbatean egin zuen bere VII. Batzarra Bilboko Euskalduna jauregian, koordinatzaile ardurarako bi hautagai zeudela. Alde batetik, Igor Irigoien bilbotarra, orain arteko koordinatzailea eta alderdiko sektore ofizialeko kidea, eta, beste aldetik, Jose Vicente Ojinaga zinegotzia 1995etik eta Berpizten sektore kritikoko ordezkaria. Araba, Bizkaia eta Gipuzkoako Ezker Batuko Batzar Nagusian kritikoek %23 atera bazuten ere, Ojinagak ez du hainbeste babesik jaso eta Irigoienek 249 ordezkarietako 201 boto, %81,7, eskuratu zituen. Sopeloztarrak, ordea, 45 boto baino ez zituen izan. Bizkaiko EBren estrategia finkatzen duen agiri politikoa ere onartu zuten larunbatean, koordinatzaileak lortutako antzeko boto kopuruz. Era berean, lurraldeko zuzendaritza berritu zuten, Irigoienen zerrendako 24 kide eta Ojinagaren hautagaitzako 5 lagun bertan izango direla.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun