Mendibike elkarteak antolatuta, 405 lagunek parte hartu zuten, larunbatean, Gorlizko XVII. Mountain Bike jardunaldian. Herri lasterketako 231 parte hartzaileak izan ziren irteeratik abiatzen lehenak, 9:30ean. Bakar batzuk baino ez zuten osatu ordu eta erditik beheragoko denboran 20 kilometroko ibilbidea. Bitartean, 64 haur eta gaztek 4 kilometro egin behar izan zituzten, pinudi inguruan jarritako ibilbidean. Ondoren, izena emandako 110 profesionalei heldu zitzaien txanda, 11:30ean ekin baitioten Bizkaia XC lehiaketari, lurraldeko txirrindulari onenen izenak emango zituena eta Euskadiko BBT Txapelketarako puntuagarria. Bada, Fanoko zirkuitu gainean egindako proba gogorregia suertatu zen; izen-emandako guztietatik 63 lasterkari baino ez ziren sailkatu. Argazkian, Gorlizen garaipena lortu zuen Elite kategoriako Jose Antonio Diez, beste proba batean / El Pedal del Occidente.
Gauzak horrela, Elite kategorian, Castroko Jose Antonio Diez izan zen garaile, Patxi Cia 4 segundu bakarrik ateraz. Aketza Peña hirugarren iritzi zen helmugara, 3 minutu eta 42 segundura eta berak jantzi zuen Bizkaiko txapeldunaren maillota. Master 30 kategorian, Ibon Oz. de Zarateren aurretik heldu zen Iñigo Tellaetxe, lurraldeko txapela erdietsiz. Kadete mailan, Mendiz Mendi taldeko Xabier Gomezek irabazi zuen. Juniors kategorian Ibon Gomezek. Azkenik, Master 40 kategorian, Mendibike taldeko Jabier Aguirre gorliztarrak irabazi eta berak jantzi zuen Bizkaiko txapeldunaren maillota. Bestalde, emakumeen artea, Olatz Odriozola heldu zen lehendabizi helmugara. Hala ere, txirrindulari bizkaitarrik ez zen sailkatu eta, hortaz, ez zuten inor Bizkaiko txapeldun izendatu ahal izan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun