Kilometroak 2008 jaialdiko antolatzaileen hitzetan, sinplea bezain esanguratsua da aukeratutako logotipoak: euskal ikono bat ekartzen digu gogora, euskal artearen iturriekin bat datorren ikonoa, hain zuzen ere. "Euskal ikonoa ez bezala, logotipo hau hiru atalez osatua dago. Hiru atal horiek indar, bide (Iruran hasi, Anoetan jarraitu eta Laskorainen bukatu), proiektu desberdinen elkargunea irudikatzen dute, elkartasunak eraikitze prozesuan laguntzen baitu", azaldu dutenez. 2007ko maiatzean hasi ziren eraikitzen ikastola berria (horrek hartuko du lehenengo gunea). Eta bere garaian jarritako helburua, behintzat, lortu dute: Lehen Hezkuntzako ikasleek ikastaro berria eraikin berrian hastea, alegia. Eraikin hori irailaren 8an inauguratu zuten.
Eraikitzen
Hain zuzen ere, lekurik ezak dakar eraikin berri baten apostua da aurtengo Gipuzkoako ikastolen aldeko jaiaren ardatza; eta horretara bideratuko dute igandean lortutako dirua. Izan ere, gaur egun Ikastolako gelak 3 kokapen ezberdinetan banaturik daude: ikastolan, udal liburutegian eta barrakoi aurrefabrikatu batean eta gainera jangela zerbitzua eta informatika-tailerra jasotzeko udaletxeko eta apaiz-etxeko aretoak erabiltzen ditu. "Eraikitzen" lemari dagokionez, herriko haur gehienak eta beren gurasoak Ikastolaren ingurunean biltzen dira, horren inguruan eraikitzen dituzte euren arteko harremanak, horren inguruan eraikitzen da herria, txikitik handiagora, etengabeko jardunean. "Guztiok, bide bat, indar bat, lan bat, proiektu bat, Ikastola bat eraikitzen ari gara", adierazi dutenez.
Iruran ospatuko da igande honetan, urriak 5, Gipuzkoako ikastolen aldeko aurtengo jaia, "Eraikitzen" lematzat hartuz. Gauzak horrela, autobusa antolatu dute Berbots Erandion Euskaraz! elkartekoek, bertan parte hartu nahi duten guztientzat. Horrenbestez, goizeko 9etan abiatuko dira Altzagako ontziralekutik, Gipuzkoa aldetik 19:30ean bueltan etortzeko. Izena emateko, 5 euro ordaindu beharko dira, horretarako La Plaza tabernara hurbilduz. Osteguna, hilak 2, izango da azken eguna. Bitartean, Iruran egitaraua prest dute jada Kilometroak 2008 festarako. Ohikoak diren musika kontzertu edo bertsolari ekitaldiez gain badira berrikuntza aipagarriak. Edoskitze eta bluetooth guneak, edo zeliakoentzat menu bereziak, esaterako. Aurtengoan kale animazioak garrantzi berezia izango du gainera, perkusio taldeekin eta txarangekin, besteak beste. Argazkian, Erandion zein Erandiotik kanpo hainbat ekitaldi antolatzen ditu Berbotsek, tartean ekainaren 15ean udalerriko kaleak alaitu zituen Kantaguneak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun