Getxoko klubek euskaraz eskaintzen dituzten entrenamenduen berri ematen du Kirola Euskaraz Gidak
Getxoko Udal Euskara Zerbitzuak 2008/09ko Kirola Euskaraz Gida kaleratu berri du, tokiko erakundeak eta Bizarra Lepoan euskara elkarteak sustatu eta dinamizatzen duten Gehitu Kirolera egitasmoaren barruan. Egitasmo hori Getxoko Udalak herriko gizarte eremu ezberdinetan euskara normalizatzeko martxan daukan Getxo Euskalduntzeko Hitzarmena (GEHI) proiektuaren adarretako bat da. Horren ildotik, iaz 32 kirol elkartek euskara sustatzeko hitzarmenak izenpetu zituzten, gure hizkuntza bakoitza bere neurrian erabiltzeko konpromisoa hartuz. Hain zuzen ere, konpromiso horien berri eta elkarte horiek euskaraz eskaintzen dituzten entrenamenduen berri ematea da Kirola Euskaraz Gidaren helburua. Horrela, elkarte edo talde bakoitzak, hartutako konpromisoaren arabera, euskaraz eskaintzen dituzten zerbitzuak zehazten ditu argitalpenak, tartean ea txartelak elebidun dauden, bazkideentzako eskutitzak zein hizkuntzatan bidaltzen diren edo entrenamenduak euskaraz izateko aukerak. Argazkian, Gehitu Kirolera! hitzarmena sinatu duten hainbat kirol ordezkari Imanol Landa alkatea eta Bizarra Lepoaneko ordezkariekin batera Euskal Kultur Jardunaldietan / Bizarra Lepoan.
Gidan arraun, atletismo, boleibol, eskubaloi, pilota, futbol, herri kirolak, hockey, igeriketa, waterpolo, mendia, kayaka, tenisa eta txirrindularitza kiroletako elkarteak edo taldeak agertzen dira. Horiekin batera, kirol bakoitzeko hiztegi txiki bat eta edozein kirola egin baino lehen luzatzeak egitearen garrantzia ere azpimarratzen ditu gidak. Amaitzeko, Getxo Markaren helburua gogoratzen du, hau da, Getxon egiten diren kirol guztietan, antolaketa koordinatua eta parte hartzailea, eta era berean, lehiakorra lortu nahi izatea, zenbaitetan, udalerriko kirolean egon den atomizazioari amaiera emateko, udal iturrien arabera. Udalaren eta Bizarra Lepoanen arteko lankidetzari esker, guztira 10.000 gida argitaratu dituzte eta 6 eta 16 urte bitarteko seme-alabak dituzten gurasoei bidaliko dizkiete, baita kirol elkarteetara, Fadurako eta Gobelako kiroldegietara, udalerriko ikastetxeetara eta leku publikoetara ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun