Iker Beristain Gutierrez "Beris" algortarra (argazkian) atzo atera zuten Frantziako Fleuroy-Merogis espetxetik Meaux-Cahuconin-Neufmontiers-era eramateko, Uribe Kostako Amnistiaren Aldeko Mugimenduak Etengabe bitakoaren bitartez jakinarazi duenez. Bigarren espetxe hori Getxotik 974 kilometrotara dago eta, bertan, beste hiru euskal preso politiko daude. "Aipatu behar da Iker bizkarreko lesioa daukala eta azken aldian horretarako arreta eskatzen ibili dela, eta teorian zerbait egiteko zirenean eraman egin dute beste espetxera. Beste alde batetik, bere aita gaur bisita egiteko irten zen atzo bertan Fleury-Merogisera eta, horretara, semea ikusi barik bueltatu behar izan duela etxera", adierazi du errepresioaren kontrako erakundeak.
Frantziako Poliziak Saint Thibault-des-Vignesen (Parisetik gertu, 30 bat kilometrotara ekialderantz) atxilotu zituen 2007ko uztailaren 2an Iker Beristain algortarra eta Liher Rodriguez aretxabaletarra. Berri agentziek, iturri judizialak aipatuz hedatu zutenez, "antolatutako erakunde batentzat arma bidez lapurreta egitea" eta "helburu terrorista duen gaizkile talde bateko kide izatea" leporatu zien epaileak biei eta egun horietan Frantzian atxilotutako beste hiru euskal herritarrei. "Dokumentu administratibo faltsuak izatea, idatzi publiko faltsuak antolatutako erakunde batentzat erabiltzea eta auto matrikula faltsuak erabiltzea" ere egotzi zien epaileak. Beristain eta Rodriguezi "lehen eta laugarren mailako arma eta munizioak eduki eta garraiatzea" ere leporatu zien, aipatutako iturrien arabera, baita "dokumentu publikoak faltsutzea" ere. Atxilotu eta, hiru egun beranduago, Fleuryn (Frantzia) espetxeratu zuten. Espainiako Polizia Nazionaleko Informazioko Komisaria Nagusiak ETAko kide bilatuenen zerrendan sartu zuen Beristain 2007ko martxoan. "El Correo Español"-ek zabaldutakoaren arabera, Frantziara ihes egin zuen 2004an, Guardia Zibilak Bizkaian egindako polizia operazioaren ondorioz, "non hamabost bat ustezko ETAko kide eta laguntzaile" atxilotu zituzten.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.