Ostegun honetan, urriak 2, bilduko da berriro Uholdeetako Batzorde Berezia eta, bertan, Gobela ibaiaren egokitze hidraulikoko egitasmoari buruz, Udaleko alderdi politikoek zein ekaineko uriolen ondoren sortutako bi ellkarteetako ordezkariek aurkeztutako hobekuntza proposamenak aztertuko dituzte. Bada, Eusko Jaurlaritzaren menpeko Uraren Euskal Agentziak (Ura) idatzitako proiektu hidraulikoa guztiz gauzatu bitartean hainbat neurri hartzea eskatu du Getxoko PPk: Gobela ibaia eta bazterrak zein Bolueko lohiak garbitzea; errekak gainezka egitekotan, ur horiek hartzeko eremua prestatzea tokiren batean; begi txikiak edota bakarra duten zubien zainketa berezia egitea; eta uraren maila neurtuko duten sentsoreak jartzea, larrialdia egotekotan ahalik eta lasterren ekin ahal izateko, besteak beste. Eduardo Andrade popularren ordezko bozeramailearen hitzetan, "denbora luzea igaro daiteke Ura agentziaren proiektua guztiz gauzatu arte. Hortaz, neurri txikiagoak aplikatuz arindu behar dugu prozesua, bitartean eurite handiak izatekotan berriro uholdeak gertatu ez daitezen". Argazkian, udal langile bi errekan.
"Presazko neurri" horiez gain, euri urak eta ur zikinak banatzea; Itzubaltzeta / Romoko garaje eta sotoak urez bete daitezen ekiditeko neurriak aztertzea; eta, Ura agentziaren egitasmoak ubidea Ibaigane kaleko etxebizitzetatik aldentzeko lanak ere hartzea proposatu du Getxoko PPk. Azken horren harira, mozio bat aurkeztu zuen joan den ostiraleko udal batzarrean PSE-EEk, baita popularren botoekin aurrera atera ere. EAJ abtenitu egin zen. Joseba Arregi Hirigintza zinegotziaren arabera, aipatu Jaurlaritzaren proiektuaren helburua uriolak saihestea da eta "Ibaiganen ez dago horrelako arriskurik", nahiz eta etxe batzuetatik zentimetro gutxitara igaro ibaia. Almansa sozialisten bozemailea, orduan, Gobelarako proiektuak erreka igarotzen den toki guztiak hartu behar dituela erantzun zion, "Udondon hasi eta Berangon amaitu". "Auzotarrak kanpoan utziko dituen egitasmoa" ez du babestuko PSE-EEk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun