Tito Parisek abiatuko du datorren ostiralean munduko musiken zikloa Leioan

Berezitasuna, izaera krioilo, sustraien tradizioa... Tito Parisek 2007an plazaratu zuen azken diskoa, eta, bere musikan, erritmoa moteldu edo arintzen du, Angolako zein Portugal iparraldeko eraginak nahasten ditu, Mozambikerantz desbideratzen da edo Brasilgo sanba jotzen du. Kroke, berriz, (Krakovia hiri poloniarraren izen 'yiddish'-a) musika 'klezmer' tradizionalean inspiratzen da, bere moldaketa eta inprobisazioen oinarri gisa, baina eragin garaikideak ere integratzen ditu. Musika klasikoaren, jazzaren, 'new age'-aren eta ijitoen musikaren gainean duen ezagutza sakonaz baliatuta, taldeak ezohiko soinua sortzen du: aparta, guztiz “ekialdekoa”, eta zoragarriki exotikoa. "Seventh Trip" disko berria aurkezteko biraren hasiera izango da Leioako kontzertua.

Arto Tunçboyaciyan eta Mafalda Arnauth

Arto Tunçboyaciyan Armenian Navy Banden liderraren bakarkako lanek Anatoliako eta Armeniako sustraiko musika aztertzen dute, sorkuntzarako eragin berriekin eta bizitzari ilusioz begiratuta. Ospetsua da folk avant-gardearen eszenan, eta Europako artisten 200 disko baino gehiagotan hartu du parte –artista horien artean, World Music delakoaren izenik ospetsuenetako batzuk daude: esate baterako, Sezen Aksu turkiarra eta Eleftheria Arvanitáki greziarra–, eta, AEBetan, jazzaren figura handi askorekin kolaboratu du; esate baterako, Chet Baker, Al Di Meola edo Joe Zawinulekin. 2007tik, mundu osoko musikariak hartzen dituen “Continental Breakfast” proiektuan sartuta dago.

Duen ahots gaztearen freskotasunarekin, hasieran naturaltasunagatik liluratu zituen musikazaleak Mafalda Arnauthek; gero, Portugaleko memoria kolektiboa antzinako arrakasten bilduma baten bidez azaleratzeagatik; eta, azkenik, bere izaeragatik, egin dituen konposizioengatik eta duen nortasunagatik. Mafalda fadoaren bitartez agertzen zaigu, eta errepertorioa zabaltzeko beharra dauka, aletxoa emanez bere herrialdeko kulturari. Kontinente bakoitzean marka bat uzten du: inspirazioa ekarri zion iraganekoa, bizi duen orainaldikoa, eta lortu nahi duen etorkizunekoa.

Zinema musika eta jazza

Bitartean, urriaren 18an, larunbatarekin, zinema musika saioa eskainiko du Txatarreria Keaton taldeak. Zinema ulertzeko modu bati egindako omenaldi apala, proiekzio aretoak krisi betean dauden garai honetan. Antzinakoa bezalako une ahaztezina igarotzeko gonbita, Buster Keatonek interpretatu eta zuzendutako pelikula batzuen (“Aurpegi zurbila”, “Errementaria” eta “Ipar Poloa”) soinu banden zuzeneko inprobisazioarekin. Saioa Kultur Leioako entzungelan izango da, 20:00etan, 6 euroren truke. Bestalde, urte bukaera bitartean, hainbat kontzertu eskainiko ditu blues.jazz zirkuituak. Kultur Leioatik igaroko dira Mamassita Pro emakume laukotea (Euskal Herria), urriaren 17an; Julian Kanevsky Trio (Argentina), azaroaren 21ean; eta Terela Gradin + Gem Trio (Galizia), abenduaren 20an. Saioak 22:00etan izango dira, 6 euroren truke.