Egunean bertan, helduak goizeko 8etan hasiko dira ibiltzen Algortako batzokitik abiatuta, 16 kilometroko ibilbidea osatzeko. Fadura, Iturgitxi Estarta, Sustatxa eta Muinarrekolandatik igaroko dira, hamaiketakoa Urduliz eta Sopela arteko Santa Mariñe haitzetatik hurbil hartuko dutelarik. Hortik aurrera Sopela, Berangoko metro geltokia, Zientoetxe errepidea eta Aixerrotatik joango dira, eta Algortako batzokia izango dute helmuga. "Ibilbidea zailtasun gutxikoa da eta gutxi gorabehera hiru ordu eta erdian egin ahal izango da hamaiketako hartzeko geldialdia barne", Itxartukoek zehaztu dutenez.
Hamar urte baino gutxiagokoentzat, berriz, beste ibilbide bat prestatu dute: Algortako batzokitik aterako dira, Aixerrota eta Azkorritik igaroko dira eta itzulera Galea eta Aixerrotatik egingo dute, batzokira bueltatuz. Ibilbide hau 6 kilometrokoa da. Irteera 9:00etan izango dute txikiek. Ibilaldia bukatu ondoren, Itxartu egunean egin ez ziren eskupilota partidak eta herri parrilada izango dira eta 13:00etan sari-banaketa hasiko da batzokiaren patioan.
Aurtengo ibilaldi neurtuan 900 partehartzaile baino gehiago espero ditu Itxartuk
Urriaren 12ko Hispanitatearen Egunerako ibilaldi neurtua antolatzen du urtero Itxartu Taldeak. Aurtengoa 26. edizioa izango da eta igande horretan 900 lagun baino gehiago biltzea espero du kultur elkarte algortarrak. Urtero partehartzaile kopuru handia elkartzen da. "Iaz 931 partaide izan genuen eta aurten, eguraldia lagun badugu, kopuru horren inguruan ibiliko garelakoan gaude", adierazi dutenez. Izen-ematea bi eratara egin daiteke: aurreko egunetan info[abildua]itxartu.com helbide elektronikoan edo ibilaldiaren egunean hasiera ordua baino lehen; eta bi kasuetan dirurik ordaindu gabe. Ibilaldiaren oroigarrizko opariren bat emango zaie partehartzaile guztiei. Hala ere, lehenengo sailkatuak sarituak izango dira. Argazkian, umetxoak sariak eskuan, ibilaldi neurtuaren aurreko edizio batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun