Atzo egindako batzarrean, alderdi politiko zein auzotarrek Gobela ibaiaren egokitze hidraulikoko egitasmoari egindako ekarpen eta proposamenak aztertu zituen Uholdeetako Batzorde Bereziak. Joseba Arregi Hirigintza zinegotziaren arabera, "oraindik itxi ez diren gai batzuk geratzen dira adosteko, batez ere, uholde arrisku handia duten Zubilleta eta Plentzia Hiria auzoetako egoera hobetzeko proposamenen gainean". Hurrengo bilera hilabete barru inguru egingo dute, proiektua urtea amaitu aurretik itxi ahal izateko. "Lanak lehen bait lehen hastea" da asmoa. Hala ere, obretan hasi aurretik, egitasmoak ingurumenean izango duen eraginaren gaineko azterketa egin beharko dute, udal arduradunak aurreratu duenez, "hori baita, hain zuzen, errekan lanak hasteko aldez aurretik bete beharreko baldintza nagusia". Artean, Ura agentziako ordezkariek, "bideragarriak izatekotan eta aldi baterako egoera hobetu ditzaketela ondorioztatzen bada, uholde arriskua arintzeko neurri zehatz batzuk hartzea agindu dutela" aurreratu du Arregik. Gobela egokitzeko proiektua idatzi bitartean hartuko lituzkete horiek. Hala ere, helarazitako prentsa oharrean, Hirigintza zinegotziak ez du zehaztu neurriak Getxoko PPk proposatutakoak izango diren. Argazkian, udal langile bi errekan.
Arregiren ustez "emaitza ona" izan zuen atzoko batzarrak. Udalean ordezkaritza duten alderdi politiko eta ekaineko uholdeen ostean sortutako bi auzokide elkarteez gain, Eusko Jaurlaritzako eta bere menpe dagoen Uraren Euskal Agentziako (Ura) ordezkariak ere egon ziren bertan. Hain zuzen ere, Ura agentzia da errekaren egoera hidraulikoa hobetzeko proiektua prestatu duena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun