Itxartuk mila lagun espero ditu igandeko ibilaldi neurtuan
2008ko urr. 9a, 18:56
Mila mendigoizale inguruk parte hartzea espero dute igande honetan, urriak 12, Algortako Itxartu Taldeak, besteak beste, Getxoko Udalaren babesarekin antolatutako XXVI. Ibilaldi Neurtuan. Iaz 931 lagun izan ziren bertan. Helduentzako ibilaldia goizeko 8etan hasiko da eta 16 kilometrotako ibilbidea egin beharko dute horiek. Algortako batzokitik hasiko dira ibiltzen eta Fadura, Iturgitxi Estarta, Sustatxa eta Muñarrikolandatik igaro ondoren, Urdulizeko Santa Mariñe haitzen ingurura iritsiko dira, bertan hamaiketakoa egiteko. Hortik abiatuko dira berriro Sopela, Berango, Zientoetxe eta Aixerrotarantz, Algortako batzokian ibilaldiari amaiera emateko. Antolatzaileen arabera zailtasun gutxiko ibilbidea da eta, gutxi gora behera, hiru ordu eta erdiko denboran egin ahal izango da, hamaiketakoa hartzeko geldiunea kontutan hartuz. “Ibilbide erraza da magal askorik ez duelako. Muñarrikolanda (254 metro) da mendirik garaiena. Gainera, menditik ibiltzeaz gain, jendeak Getxoko paisaiarekin gozatu ederra hartzea nahi dugu”, esan du gaur, ibilaldiaren aurkezpenean, Ricardo Ansotegi Itxartu Taldeko kideak. Argazkian, umetxoak sariak eskuan, ibilaldi neurtuaren aurreko edizio batean.Bestalde, 10 urtez azpikoentzat beste ibilbide bat prestatu dute, 6 bat kilometrokoa. Txikiak 9:00etan abiatuko dira Algortako batzokitik, Aixerrotatik eta Azkorritik igaroko dira eta itzulera Galeatik egingo dute, batzokira heltzeko berriro. Izen-ematea bi eratara egin daiteke: ibilaldia ospatu aurreko egunetan info[abildua]itxartu.com helbide elektronikoan edo ibilaldiaren egunean esandako tokian eta orduan; eta bi kasuetan batere dirurik ordaindu gabe. Helduen partaidetza lagun bietako taldeetan izango da eta gaztetxoena, berriz, bakarkakoa. Partehartzaile guztiei Ibilaldiaren oroigarrizko opariren bat emango zaie eta lehenengo sailkatuak sarituak izango dira. Ibilaldia amaitutakoan, pilota partiduak eta herri parrillada egongo dira. 13:00ean, azkenik, sari banaketa egingo dute Algortako batzokiko patioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun