Asteazken honetan, urriak 13, zabalduko dute gizonezkoei bere burua zaintzen eta etxea antolatzen irakasteko tailerran izena emateko epea. Hirugarren edizio honekin, 55 urte baino gehiago duten gizonei zuzendutako programari jarraipena eman nahi diote Getxoko Udaleko Berdintasun Zerbitzuak eta Nagusien Etxeak, osasunaren eta norberaren autonomiaren arloan autolaguntza lantzeko. Izan ere, "egungo gizartean sexuen arteko desberdintasunak begi-bistakoak dira oraindik ere eta, horregatik, tailerrak azpimarratu nahi du gizonezkoek etxeko eginkizunetan eta erantzunkizunetan parte hartzeak duen garrantzia; baita beren autonomia erraztu eta bizitza kalitatea hobetzeko ezagutza eta oinarrizko trebetasunak erakutsi ere", udal iturriek nabarmendu dutenez. Argazkian, hiru gizon Itzubaltzetako nagusien etxean.
Hori dela eta, ikastaroaren helburuen artean etxeko garbitasunarekin zerikusia duten teknikak ikasteko jakinmina piztea, norberaren zaintza egiteko teknikak eta ezagutzak ematea, autozaintza sustatzea eta estereotipoak gainditzea daude. Tailerrean honako lau arlo hauek landuko dituzte: genero estereotipoak, garbiketa eta norberaren ingurua zaintzea, norberaren irudia, garbitasuna eta osasuna, eta nutrizioa eta elikadura. Begirale baten zuzendaritzapean, saio praktikoak izango dira. Dohainik, azaroaren 4an hasiko dira eskolak eta iraupena 20 ordukoa izango da, 2 orduko 10 saiotan banatuta. Urtarrilera bitarteko astearteetan emango dute ikastaroa, 10:00etatik 12:00etara, Itzubaltzeta / Romoko Ibar Nagusien Etxean. Hor ere eman beharko dute izena interesatuek datorren urriaren 29a baino lehen. Informazio gehiago 944 660 150 telefono zenbakian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun